Shillong, Nailur 19: U Myntri Sorkar Bah Renikton Lyngdoh Tongkhar hynne ka sngi Nyngkong ula pyntip ba um pat ioh jingtip satia halor ka jingthaw biang ia ka Regional Committee ban pyntyllun shakhmat ia ka jingiakren pynbeit pud jong ka wat kaba ar.
U Bah Renikton u la dei u Chairman ka Regional Committee ka West Khasi Hills ha ka wat ba nyngkong, ula ong ba ka shong ha u Myntri Rangbah ka Jylla iano ba un thung kum u Chairman.
Haba pynpaw ia ka jingsngewkhia ba ka slem, u Myntri ula mynjur ba ka por ka la nang iaid hynrei u kyrmen pat ba ka Jylla kan iohnong kumba ioh ha ka wat kaba nyngkong.
U Myntri u la pynpaw ruh ia ka jingkyrmen ba ha kane ka wat kaba ar, ka jylla kan ioh ia kiba bun ki Shnong kiba hap hapoh ka thain Langpih.
Haba kylli ba kaei ka lynti ban iaid ha kane ka wat ba ar, u Myntri ula ong ba ki san tylli ki nongrim kin long kumjuh hynrei u sngew ba ka mon jong u paidbah ba sah ha ki jaka ba iakajia kan dei ban long kaba hakhmat eh.
