Imphal, Nohprah 11: Hadien ka jingshah byrngem ban ther bomb ha ki jaka theh umphniang, ka Manipur petroleum dealers kala pynbna ban khang dam ia ki petrol pump ha kylleng ki jaka bad ki thain ba marjan ha ka 13 tarik mynta u bnai Nohprah.
Hadien ka jingjia ha ka 6 tarik u Nohprah, haba la lap ïa u hand grenade hapoh ka jaka shongthait ne rest room jong ka jaka theh umphniang Ibudhou Pakhangba ha Keikol, ka surok Koirengei, ha kaba la buhrieh ryngkat bad ka shithi jingbyrngem ban wanrah ïa ki jingma ba shyrkhei lada ym lah ban pynurlong ïa ki jingdawa ka bym shym la batai bniah.
Ka kynhun jong ki nongdie umphniang ne ka dealers’ body ka la pynpaw ba ka jingkiew jong ka jingshah byrngem, ka jingdawa pisa, bad ka jingpyntieng ïa ki nongtrei ka la pynlong ïa ki ban shem shitom ban treikam da kaba suk.
“Ka petroleum dealers kala shakri beit ïa ki paidbah jong ka Manipur kum shi bynta jong ka jingshakri kaba donkam bha, da kaba treikam baroh shisngi ha ki por ba don ki jingeh bad kumba la bthah da ki kyndon jong ka sorkar,” ong ka kyrwoh.
Kine ki jaka theh umphniang kila noh synniang shi katdei eh ha kaba iade bad ka khajna jong ka jylla bad kumjuh ruh ka jinglum ia ka VAT kaba T. 19.56 shi litar ha ka petrol bad T. 10.11 shi litar ha ka diesel.Ka jingnoh synniang tang na ka VAT man u bnai na ki pump umphniang ka long haduh ₹25–30 klur, katkum ka jingbun ka jingdie.
Shuh shuh kila maham ruh ba lada iai bteng kane ka jingbyrngem bad ka jingdawa pisa ym tang ba ka buh jingma ia ki paidbah hynrei kan ktah ruh wat ia ka khajna jong ka jylla bad ka jingtrei kam ban pynpoi ia ki umphniang sha ki jaka ba la pynbeit da ka sorkar.
Kane ka kynhun ka la buh ka jingkyrpad ïa ka sorkar ban tuklar mardor, da kaba pynpaw ba ki jaka theh umphniang ki la dep ban mad ïa ka jinghiar palat kaba ym duna ia ka 50% ha ka jingdie naduh ba la sdang ka jingeh kaba dang ïaid shakhmat naduh ka 3 tarik u Jymmang, 2023.
Naduh u bnai Kyllalyngkot mynta u snem, ka Jylla Manipur ka la don hapoh ka President rule hadien ba ka sorkar jylla kam shym la lah ban pynbeit ia ka jinglong jingman jong ka jingiaumsnam hapoh ka jylla hapdeng ki ar jaitbynriew.
