Shillong, Nohprah 9: U Myntri ka Koit ka Khiah Bah Wailadmiki Shylla ula pynbna ba ka jingthungkam ia ki 150 ngut ki Doctor kala iaid mynta ba kin leit ai jingshakri ha ki Community Health Centre (CHC) bad Primary Health Centre (PHC) ha ri-lum Jaintia.
Ia kane la pyntip da ka Western Zone jong ka Jaintia National Council (JNC) hynne ka sngi Baar, hadien ba kila phah tuklar ia u Myntri ka koit ka khiah bad ia ka Director ka Health Services (DHS) ka Dr. JS Momin halor ka jingduna jong ka jingdon ki nongtrei bad ki jingdonkam ha ki CHC bad PHC ha ka rilum Jaintia.
“U (Bah Shylla) ula pynthikna ia ka kynhun, ba ka sorkar kala shim ia ki sienjam ban shimkhia ia katei ka mat. Ka jingpynrungkam kumba 150 ngut ki doctor ha ki CHC bad PHC kala sdang bad ngin shimkhia ia ka jingduna jong ki dawai dashin bad ia ki tiar ki tar ban leh ia ki Test” la ong u President ka JNC-WZ u Hamehi Bamon ha ka kyrwoh khubor.
“U Bah Shylla ula pynbna ruh ba ia ka MRI Testing yn sa buh noh shen ha Jaintia Hills bad ka jingiakren ka dang iaid shakhmat bad ka kompani kaba pynbiang ia kitei ki tiar ki tar” ula ong.
U nongialam ka JNC ula ong, ba ka DHS Dr. JS Momin kala kubur ia ka jingeh kaba mad da ka tnad bad pynpaw ia ka jingduna jong ka jingdon ia ki Specialist ha ki katto katne ki bynta.
“(Kala pyntip) ba ki thmu ban thung ia ki Specialist ha man la ki CHC bad PHC, hynrei kila mad pat ia ki jingeh namar ka jingduna jong ki samla pule ha katei ka bynta” la ong u Bamon.
Ula iathuh ruh, ba ka Dr Momin kala ong, ba kila dep ban buh ia ki doctor ha ki district hospital bad kila phah ia ki samla pule ban pyntbit ha ka jingioh jinghikai ban pyntbit shuh shuh ia ka sap ka phong ka jongki.
 bad Primary Health Centre (PHC) ha ri-lum Jaintia.){kind=link}