Boko, Nohprah 7: Ka seng Rabha Students’ Union Kamrup District ha ka sngi Saitjain kala dawa na ka sorkar jylla ban kynthup lang ia ka Rabha Hasong Autonomous Council hapoh ka Sixth Schedule jong ka riti synshar ka ri India.
Ka Rabha Students’ Union Kamrup District, ha ka jingiatrei lang bad ka Kamrup District Women’s Council and the Sixth Schedule demand committee, kila pynlong da ka rally kaba heh bha ban pyrshah da ka tbeh da ki torch light ha ka janmiet jong ka sngi Saitjain.
Da ki hajar ngut ki jaitbynriew Rabha ha ryngkat bad ki torch light kila iaid paidbah na Gandhi Maidan lyngba ka Boko Primary Health Centre bad ka Boko Police Station, ha shwa ban pynkut ia ka ia ka rally hajan ka ophis trei kam jong ka Boko Regional Rabha Students’ Union.
Ki nongiashim bynta na ki shi phew tylli ki regional unit jong ka Rabha Students’ Union kiba don ha kylleng jong ka Kamrup district, kaba kynthup lang ia ki kynthei bad ki shynrang na ki shnong bapher bapher kila wan ban ia snoh kti lang.
Ka jingiakhih ka la sawa da ki jingpyrta da ki slogan kiba long pyrshah ia ka sorkar kum “Sorkar Assam Hai Hai”, “Ka Sorkar Assam kaba thok”, bad “Sixth Schedule ka dei ka jingdawa ka hok jong ngi” bad kiwei kiwei de.
Lah ban kdew ba ka All Rabha Students’ Union, All Rabha Women’s Council, bad ka Sixth Schedule Demand Committee kila pynlong ia ka jingiakhih ba mar katjuh ha Kamrup bad ha Goalpara districts ha kine ki ar bnai ba la leit.
Katkum ka jingong ki nongialam jong ki Rabha, Kan seng ka sa pynlong ruh ka jingiakhih ne ka dharna ha Jantar Mantar ha New Delhi ha ka 12 tarik mynta u bnai Nohprah ban pynbor ha kaba iadei bad kane ka jingdawa ka jong ki.
Haba pynpaw ia ka jingbitar kaba jur, u president ka Sixth Schedule Demand Committee u Dashanan Rabha u la kynnoh ba ka sorkar ka la shukor ia ki paidbah Rabha da ki jingkular lamler. U la maham ba lada ym lah ban pynurlong ia ka jingdawa shwa ka elekshon sha ka iing dorbar thawain ka jylla ban wan, ki seng na ka jaitbynriew Rabha kin pynjur ia ka jingiakhih jong ki. U la pynbna shuh shuh ba ki seng Rabha ki la pynkhreh ban pynieng la ki jong ki kyrtong ha ka thain Rabha Hasong. La iathuh ba ka jingpynkhreh ka dang iaid shakhmat ban iakhun ha ki saw tylli ki Assembly constituency kiba don hapoh ka Rabha Hasong bad kiwei kiwei ki jaka ba bun ki jaitbynriew Rabha.
Ha kajuh ka por, u vice president ka All Rabha Students’ Union u Pradip Rabha u la pynpaw ba ki jingïakhih kin dang ïai bteng haduh ban da pynhap noh ïa ka Rabha Hasong Autonomous Council hapoh ka Sixth Schedule.
