Shillong Nohprah 06: U Symbud Myntri Rangbah ka Jylla u Bah Prestone Tynsong ula ong, ki don ki skul kiba bun da ki nonghikai ban ia ki khynnah skul bad ka sorkar kam banse ban hap ong ia ki, ba kidei ban khang noh.
U Bah Prestone ula kren ia katei ha ka jingpynhap pyrda ia ka jingrakhe ia ka jubili ksiar jong ka St Peter and Paul Secondary School, Mawkisyiem Sohra kaba la long ha ka sngi Thohdieng.
“Ka sorkar kala shim ia ka polisi ban pynbeit ryntih noh ia ki skul. Ki don ki skul kiba bun da ki nonghikai ban ia ki khynnah skul bad ka sorkar kala shim ia ka rai kaba skhem ba ia kum kita, ngim banse ban hap ban ong ia ki, ba kidei ban khang noh” la ong u Bah Prestone bad ka bynrap. “Ba kane kadei ka jingmaham kaba la ai lypa ba ia kiba kum kita ki skul ki bym lah ban kynjoh ne bud tang ia ki jingdonkam kiba duna eh, kaba ka polisi jong ka Sorkar India bad Sorkar Meghalaya kaba ngi lah dep pyntreikam ha u snem 2019-2020”.
U Symbud Myntri Rangbah ula ong, ba ki don ki skul ha nongkyndong kiba leh bha hynrei ka sorkar kam shym la lah ban ai ka jingiarap, katba kito ki skul ki bym shim la trei bha ne ai ka jingshakri hynrei teng teng ki kham ioh bun ma ki ban ia ki skul kiba leh bha.
Ula ong, ba ka sorkar kan sa shong ban bishar bha ia katei ka bynta, ban pynthikna ba ki skul kiba trei bha kum kane ka skul (St Peter & Paul) la ka long ha ka jingbun ki khynnah, ka jingdon kiba pass bha bad ka sorkar kan don ryngkat lang bad kiba kum kine ki skul kiba leh bha.
U Bah Prestone ula kynthoh kylla ruh ia ki briew kiba kynnoh ba ka kot iarap na ka bynta ki samla pule ba pynkhreh na bynta ka Matrik ka CM Impact da kaba ong, kiba kynthoh ki dei ban tip ba kane ka dei ka kot iarap bad kam dei satia kata ka kot pule bad ula kyntu ruh ia ki paidbah bad ki kmie ki kpa ba kidei ban sngewthuh bad kim dei ban shah ialam bakla namar ba ia kane ka kot iarap la pynkhreh da kaba leh sani bad bishar bniah bha da ka MBOSE.
Haba phai sha ka jingrakhe, u Bah Prestone, ula iaroh ia ki bor pyniaid jong ka skul kiba la lah ban ai ka jingshakri ha kine ki 50 snem ban ai jingnang jingstad ia ka shnong Mawkisyiem bad ia ki shnong kiba marjan.
Katba u Myntri ka pule puthi u Bah Lahkmen Rymbui ula ong, ba ka sorkar MDA ha kine ki 7 snem tam kala pyrshang borbah ban pynjanai bad pynbha shuh ia ka pule puthi ha ka jylla baroh kawei bad mynta ki kam ki dang iaid shakhmat.
Ha kane ka jingialang, la iadonlang u MLA ka Shella u Bah Balajiedkupar Synrem, u MLA ka Sohra u Bah Gavin Mylliem, u MDC ka Sohra u Bah Titosstar Well Chyne, ki nongpyniaid, nonghikai, ki khynnah skul kiba rim bad kiba mynta.
U Bah Prestone ula pyllait paidbah ia ka kot sah jingkynmaw, ula ot ia u Cake jingrakhe ia ka jubili ksiar bad la pyniphuh iphieng ia kane ka jingrakhe da ki jingrwai bad ki jingshad kiba la iashimbynta da ki khynnah skul.
Nalor kane la pynkup burom ruh ia ka Sister Provincial ka Sister Smitha SD kaba la rakhe lang ia ka jingdap 50 snem ka jinglong riewniam.
