Shillong, Nohprah 04 : U MLA ka VPP na Nongkrem Bah Ardent M Basaiawmoit ula tyrwa ia artylli ki skhim hapoh ka District Mineral Fund sha u Myntri Rangbah ka Jylla Conrad K Sangma, bad kyrpad ba un ai ka jingmynjur ia ki project jingtei ba donkam kyrkieh ha ka constituency jong u.
Kine ki skhim ki kynthup ia ka jingshna ia ka jingkieng iaid kali ba pyniasoh ia ka surok shnong bad ka skul Presbyterian Secondary School, Umphyrnai kaba don ha Umphyrnai Rngai bad kawei ka jingkieng ha Madan Umjaut, Pomlakrai Rngi Shyllong. La tyrwa ia kine baroh artylli ki skhim mar T. 25 lak.
Ha ka shithi, u Bah Ardent ula ban jur ia ka jingdonkam ban khmih kyrkieh ia ka kam khnang ban pynthikna ia ka jingshngain jong ki nongshongshnong bad ki nongleit skul. “Nga kyrpad rit ia phi ban sngewbha mang pisa lem ia kine ki skhim kham kloi kat kaba lah” ula thoh.
