Shillong, Nohprah 01 : Ka Champion jong ka lympung SSA 1st Division-ka Nongkseh SS&CC kala pynliem kput ia ka Mawlynrei da 7-0 kol ha ka jingiakhun ka kynhun Group-B jong ka lympung SSA Champions Cup ba long hynne ka sngi Nyngkong ha madan SSA 1st Ground, Polo.
U rang ialehkai ba shakhmat ka Nongkseh, u Chesterpaul Lyngdoh ula ioh ban khyrwit haduh 3 kol ne hattrick ha kane ka jingiakhun.
U Chesterpaul u la ioh ban thep ia kine ki kol ha ka minit kaba 40’, 45’+3, 58, ia kaba la bynrap lang sa ki kol na u Kitboklang Pale (51’, 53’), Hardy Cliff Nongbri (63’) bad Gerrard Dakerlang Sun (84’).
Da kane ka jingjop, ka Nongkseh ka dang iai neh ha ka kyrdan kaba ar, katba na ka liang ka Mawlynrei, kala hiar sha ka kyrdan kaba saw ha ka group.
Hashuwa kane ka jingiakhun, ka Umlyngka kala iakhun pyrshah ia ka Mylliem Lum ha ka Group A bad ka Umlyngka kala ioh khur ia ka nam jop da ka jingioh ban thep 1-0 kol. Ia kane ka kol la ioh ban thep da u Samborwell Nongbsap ha ka minit ba 67.
Ka Umlyngka watla kala ioh ban khur iakane ka jingjop ryngkat bad ka lai point, hynrei ka thong ia ka ba kan jam sha ka thong ban poi shakhmat, kam lah shuh ba kan urlong hadien ba ka la mad arsien ki nam rem na ka Group-A.
Lashai ka sngi, ka jingiakhun kan long ka Laitkyrhong pyrshah ia ka Shillong Lajong, ka jingiakhun ka Group-B kaban long ha ka por 1 baje mynsngi, bud pat da ka jingiakhun hapdeng ka Langsning FC pyrshah ia ka MLP FT kaba dei jong ka Group A kaban long ha ka por 4:30 janmiet.
