Shillong, Naiwieng 29 : Ka Iingkashari Meghalaya High Court kala bthah ia u Superintendent of Police ka East Khasi Hills ba un ai ia ka jingiada ki Pulit ia u trai ka Resort namar ka jingiakajia pud jong ka jaka bad ki nongkitkam ka Shnong Laitryngew.
“Namar kata la buh ba tad haduh ka sien shong bishar ban wan, la bthah ia u Superintendent of Police ka East Khasi Hills ba un hukum ia u Officer Incharge ka Sohra, ba un shim ia ka sienjam halor ka ejahar jong u nongmudui bad ban pynthikna ban pynneh iaka suk ka sain bad ym dei ban mih kano kano ka jingkulmar ia mynta” ong u Justice HS Thangkhiew ha ka hukum ba pynmih ha ka sngi Thohdieng haba shong bishar ia ka jingujor jong u trai kawei ka resort Bah P Sengborlang Nongkynrih.
La pyntip ia ka Iingkashari ba wat hapdeng ka jingujor sha u Syiem ka Sohra bad ka ejahar bala mudui ha ka 5 tarik Risaw bad 13 tarik Risaw 2025, ki Pulit kim shym la shim ia ka sienjam kaba dei, kaba pynlong ia une u nongmudui ban wan tied ia ka jingkhang jong ka Iingkashari.
Kane ka jingiakajia ka mih na ka jingiakajia pud jong ka jaka hapdeng ka shnong Laitryngew bad ka Pdengshnong, Sohra.
Ki nongshhah mudui, ki nongkitkam ka shnong Laitryngew, la kynnoh ba kila leit pynthut ia ka jingtreikam jong kane ka Resort, kaba la shna ha la ka jong ka nongkynti hadien ka jingpan jingbit.
Ka Iingkashari kala buh ban shong bishar biang ia kane ka mukotduma ha ka 15 tarik Nohprah, 2025.
