Wer u CM ka Meghalaya ia ka jingiatylli ka NE | “Ka jingiapait iapra ka pyntlot ia ka sur ha Delhi”

Shillong, Naiwieng 27: U Myntri Rangbah ka jylla uba long ruh u National President ka National People’s Party (NPP) u Conrad K. Sangma, hynne ka sngi Palei ula leit iashimbynta ha ka “The One North East Thansa (Unity) Rally” kaba la long ha Astabal Ground, Agartala.

Haba ai jingkren, u Conrad ula ong, “Katba ka nang iapait iapra para ma ngi katta ka sur ka jong ngi kan long kaba tlot bad bym iohsngew. Katta ka dang don ka jingiaphiah hapdeng ka jong ngi, nang bun ki jingeh kin dei kiban nym shah shimkhia. Lada u dieng u ieng marwei, wat ka eriong ruh ka lah ban pynkhyllem noh ia u. Hynrei ki dieng kiba ia mih ryntih lang ha ki khlaw ki lah ban beh kylla ia ka eriong. Wat ha ka histori ruh ka pyni ia ka jingkhlain ka long kaba khraw la da iatylli. Kane kadei kaba ngi hap ban pyni ha ka jingiaid shakhmat ha ka jingkiew ka roi ka par”.

Da ki hajar ngut ki paitbah kila wan sakhi ia ka jingialang jong ka jingsiangewthuh jingmut bad jingiatylli ki nongialam ka thain ha ka jingialang paidbah kaba nyngkong eh jong ka kynhun ‘One North East’.

Ia kane ka jingialang paitbah la pynlong hadien ka jingpynbna ia ka “One North East” lyngba ki lad pathai khubor ha ka 4 tarik u Naiwieng 2025 ha New Delhi, ha kaba ki nongialam kiba pawkhmat ka thain kynthup ia u Conrad Sangma kila iakren bad ki lad pathai khubor ban thaw ia kawei ka rynsan jong ki seng sain pyrthei ban pynkhlain bad pynsawa jam ia ka sur ba angnud jong ki paitbah ka thain Shatei Lammihngi ka ri.

Ryngkat bad u Myntri Rangbah ka jylla kiwei pat ki nongialam kiba pawkhmat na kylleng ki thain kila wan iashimbynta ha kane ka jingialang paitbah, kiba kynthup ia u James P. K. Sangma u Working President ka National People’s Party (NPP), u Daniel Langthasa u nongseng ka People’s Party (Assam) bad dkhot barim jongka MAC, Dima Hasao Autonomous Council u Mmhonlumo Kikon, u Myntri Sorkar barim ka Nagaland, u nongthoh kot bad nongtrei mon sngewbha u R.K. Meghen, u nongialam ba rangbah ha Manipur u Hemochandra Singh, u Lamphang barim ka Manipur Legislative Assembly bad u Myntri Sorkar barim ka Manipur u Ajoy Edwards, u Nongseng bad President jongka Indian Gorkha Janshakti Front (Gorkhaland, Darjeeling).

Nalor kine, kiwei pat ki nongialam kiba pawkhmat ki kynthup ia ki nongialam jongka TIPRA Motha Party u Pradyot Bikram Manikya, u Nongseng ka TIPRA Motha Party u B.K. Hrangkhawl, u President ka TIPRA Motha Party u Jagadish Debbaram, u Chairman ka TTAADC u Purna Chandra Jamatia, u CEM ka TTAADC, ki Myntri Sorkar kiba kynthup ia u Animesh Debbarma, Brishaketu Debbarma bad katto katne ki MLA, Executive Member bad MDC jongka TIPRA Motha Party kila iadonlang ha katei ka jingialang paidbah.

U Conrad Sangma ula pynpaw ia ka jingsngewnguh ia ka jingmih ryntih ki paidbah bad ong ba kane ka khyllipmat ka long kaba don ia ka jingsngew na ka bynta ki jaidbynriew riewlum jong ka thain shatei lammihngi.

Ula pynpaw ba ka jingdon ia ka jingsngew kadei ka jingkhlain jong ki paidbah ka thain, ka lah ruh ban long kaba sngewkhia ban pynlong ia ka jingiatylli kaba kongsan haba mad ia kino kino ki jingtynjuh.

“Kin don bun ki briew kiban pyrshang ban phiah ia ngi ha ki bynta ki bapher bapher. Hynrei ngi dei ban pyndonkam ia ki jingsngew ki jong ngi ban pynneh ia ka jingiatylli. Ka sur ka jong phi kadei ban long kaba iohsngew ha baroh ka thain shatei lammihngi” ula ong.

“Kala dei ka por ba ngi dei ban ia wanlang hajuh kum kawei- Kawei ka North East. Ka jingtynjuh kaba ngi mad mynta kadei ka jingiaphiah hapdeng ki jaidbynriew ki bapher bapher. Na kane ka rynsan, ngi dei ban pynmih ia ka sur bad ban long lang noh kawei”.

Haba pynpaw ia ka jingiakhun bad ia ka jingiengskhem jong ki nongialam ha ki pateng kiba rim, u Sangma ula kubur ba ka jingpyrshang ka jongki ban pynneh ia ka jinglong tynrai jong ki riewlum pateng la pateng. Watla ki jingeh kila mih ha ka thain, hynrei ka long pat kaba kongsan bha ban iai bteng ban pynneh ia ka jingriewspah jong ka kolshor kaba rim, ka ktien bad ka jinglong kyrpang jong ki riewlum.

Ula pynpaw ba ka lynti kaban iaid nangne shakhmat kan ym long kaba suk, hynrei ula pynthikna ia ka jingialang ba ia ki jingeh bad jingtynjuh kan dei kaba kin mad bad kin iakhun lang kum kawei ka kynhun bad ban wad lang ia ki lad ki lynti bad yn sa lah ban pynbeit lang bad man la ki sienjam kaba kin shim nangne shakhmat kan dei da ka jingsngewsarong.

“Shisien ngi lah ia iaid hala ka jong ka lynti, hynrei mynta ngin sdang ban iaid noh kum kawei. Yn ym don kiban shah ieh shadien, kane kadei ka lynti iaid kaba ngin ia shimlang” ula pynpaw bad ka iengskhem ha kaban iaid ha ka nongrim bad ka jingiohi jngai na ka bynta ka thain shatei lammihngi kaba tylli.

Ha kaba iadei bad ka jingshah niewbeiñ ki samla ka thain Northeast, u National President ka NPP ula ong, “Ka pynmong ia baroh ki nongshong shnong ha ka thain shatei lammihngi haba ngi iohsngew shaphang ka jingshah lehbeiñ pyrshah ia ngi. Ngi kwah ba ka jingiapher jaidbynriew ka jong ngi kan long noh kawei bad da kane ka rukom pyrkhat bad jingiatylli, ngi lah ban iakhun lang ia kano kano ka jingeh”.

Ula ong ruh, ba u kwah ban pynsawa jam ia ka sur na kane ka rynsan bad ka ong, katba ngi dang saphret, katta ngin dang kylla long kiba tlot.

Katba u Pradyot Bikram Manikya u nongseng jongka TIPRA Motha Party, ula pynpaw ia ka jingsngewnguh ia baroh ki nongialam kiba la wan na kylleng ki bynta jong ka thaiñ shatei lammihngi ban iashimbynta ha kane ka jingialang kaba long ruh ka histori.

“Ha ki khyndiat snem, ngi lah pyniatylli ia ki trai ri trai muluk hapoh Tripura, mynta ngi lah shim ia ka sienjam kaba kham khraw ban pyniatylli syndon ia ka thain shatei lammihngi baroh kawei. Kane ka dang dei tang ka jingsdang” ula ong.

Kiwei pat ki nongialam kila pynpaw ia katei kajuh ka jingsngew ba ka jingiatylli bad ka jingdonlang ia ka jingiohi jngai ka long ka bynta kaba kongsan tam na ka bynta ka lawei jong ka thaiñ. Kila iaroh ia ka sienjam kaba la shim da u Conrad
Sangma bad u Pradyot Bikram Manikya ha kaban maitphang ia ka jingpyrshang ban wanrah ia baroh ki jylla ka thain shatei lammihngi hapoh jong kawei ka rynsan.