Dawa ka KSU ban kyndang ia ki nongbuhai shnong be-ain ha Maxwelton Estate bad Mahedev Khola

Shillong, Naiwieng 27 : Ka Khasi Students’ Union (KSU)-Laban Circle kala dawa ia ka Sorkar Jylla ba kan kyndang mardor ia baroh ki nongbuhai shnong be-ain ha Maxwelton Estate bad Mahadev Khola.

Ha ka shithi bala phah sha u Myntri ka Tnad Revenue & Disaster Management Bah Lahkmen Rymbui ha ka sngi Palei, ka KSU kala ong “ Ngi kyntu ia u Myntri ba un pynsted ia ka kam ban kyndang ia kine ki nongbuhai shnong beain bad iada ia ka jingmyntoi jongki tari muluk ka thain”.

Ka KSU ka ong ba 9 acre ka jaka ha Maxwelton Estate, kaba hap hapoh u pud u sam ka Dorbar Shnong Kenches Trace Oxford Rilbong (K.O.R), ka dei ka revenue land bad ka dei jong ka Sorkar Meghalaya. Ki don bun ki nongbuhai shnong beain ha ka thain khlem da ioh jingbit ne jingmynjur jong ka Dorbar Shnong lane kino kino ki borkhmih ba kin leh ia kane. Kala kdew ruh ia ki jingsngewkhia halor ka koit ka khiah, ka khuid ka suba bad ka jingjaboh ka sawdong sawkun.

Haba thalain ia ka jingbym leh eiei ka Sorkar, ka Seng kala kut jingmut ba kan pynbteng ia ka jingshna iing ia ki trai ri trai muluk ha Maxwelton Estate.

“Ka Sorkar la i kumba ka pdiang ia ki sienjam bala shim da ka KSU namar kala iaid la jan shisnem hynrei kam shym la leh eiei halor kane ka kam. Lad aka Sorkar kam lah ban leh eiei ia kane ka kam kaba la sahteng la slem, ka seng kan bteng ha kaban tei ia ki jingtei ban eh shirta ha Maxwelton Estate na ka bynta ki trai ri trai muluk ka thain” kala ong.

Haba iadei bad ka Mahadev Khola, ka KSU kala kynnoh ba ki nongbuhai shnong beain kila tei ia ki jingtei ban eh shirta bad bret ia ki jaboh jabain ha ka wahduid ba marjan bad pynjaboh ia ka.

Ka KSU kala leit pynpra ia katto katne ki jingtei dang shen, hynrei ki bor District kila khot iakren ha ka jaka ban leh eiei ia kane ka kam.

“Ka Seng kala ujor la bunsiem bad ki bor ba dei khmih halor kane ka kam hynrei baroh ki poi sha ki skhor ba kyllut bad ki jingtei beain kila nang iaid, kaba la pynbor ia ka seng ban leit pynpra ia kine ki jingtei bad la shah tynjuh bor ha ki briew ka ain bad hadien kata, ki bor District kila khot ban iakren bad iasyllok halor kane ka kam”.

“Ka bor district kala aiti ia ka kaiphod sha phi halor ki jingshem jong ka bad ka Seng ka kwah da ka jingsngewrit ban kyrpad ha kaban pynsted noh ia ka kam ban kyndang ia ki nongbuhai shnong beain ha Mahadev Khola” kala bynrap.