Hashuwa ka Khristmas yn pynbna ka Sorkar ia ka rukom siew tulop sha ki Nonghikai SSA

Shillong, Naiwieng 27 : U Myntri ka Tnad Pule Puthi Bah Lahkmen Rymbui, ula pyntip ba ka Sorkar Jylla kan sa pyntreikam noh ia ka rukom siew tulop (pay structure) ba ka la pynkhreh sha ki nonghikai SSA hashuwa ka Khristmas.

U Myntri ula pyntip ia kane ha ka jingiakynduh bad ki Nongialam ka Meghalaya SSA School Association (MSSASA) ha ka sngi Palei.

Kane ka seng kala kyntu ia u Myntri ba un tuklar lem ha ka ban leh eiei noh iaki mat jingdawa ka seng kynthup ia ka jingpyndep bad pyntreikam ha ka por ba biang ia ka rukom pynbeit ia ki skul SSA bad ka rukom siew tulop.

“Ngi ai khublei ia ki sienjam bala shim da ka Sorkar Jylla ban pynbeit ryntih ia ki skul SSA. Ngi la ai jingmut ba kane ka kam ka dei ban dep shuwa ban sdang ka samoi long skul ban wan bad u Myntri ula kular ha ngi ba ka Sorkar kan pyrshang ban pyndep ia kata” ong u President ka MSSASA Bah Aristotle C Rymbai haba iakren bad ki lad pathai khubor hadien ka jingialang ha ka sngi Palei.

“U Myntri ula pyntip ruh ia ngi ba ki kam ban pynbeit ryntih ia ki skul SSA ka lah ban shim katto katne por namar ka Sorkar kan hap ban iasyllok bad ki kynhun ba don bynta khamtam ki skul Missionary bad skul shimet” ula ong.

Ka Association kala kyrpad ruh ia ka Sorkar ba kan mynjur ha ka ban ai ka jingpynjynsur ba shisien ia ki nonghikai SSA kiba la dep shongthait, ban pynlah ia ki ba kin aplai ia ki kam kiba lait ha ki skul Sorkar.

“Halor kane, u Myntri ula kular ban sa shong bishar bad iasyllok bad baroh ki tnad ba dei khmih namar kane ka kam ka don jingiadei ruh bad kiwei ki Tnad kum ka Personnel bad Tnad Ain. Hadien ka jingiakren bad kine artylli ki Tnad, un sa pyntip sha ka Association halor kane ka bynta” ong u Bah Rymbai.

Haba iadei bad ka Teachers’ Eligibility Test (TET), u Myntri u pyntip ba ka Tnad kala pynkhreh ia ki kam ba donkam naka bynta ban pynlong ia ka eksam, hynrei kala pan ia ka jingpynshai halor ki kyndon treikam na ka bynta ki nonghikai kiba la don lypa ha ka kam.

“U Myntri ula pyntip ba ka Tnad Pule Puthi kala pynkhreh ia baroh ki kam ba kumno yn pynlong ia ka TET hynrei ka jingkylli kaba mih ka long la ki nonghikai kiin ioh ne em ban iakhun ia kane ka TET. Kumta, ha ka taiew ban wan, u Myntri un sa iakynduh ia ki borkhmih ha ka Ministry of Education bad NCTE ban pan ia ka jingpynshai halor ki kyndon naka bynta ki nonghikai kiba la don ha ka kam”.

Halor ka jingpyntreikam ia ka rukom siew tulop (pay structure) naka bynta ki nonghikai SSA, u Myntri ula pynbna ba ka Sorkar kan sa pynbna ia ka rukom siew tulop hashuwa ka Khristmas, ka ban treikam naduh ka 1 tarik Iaiong, 2026.