Shillong, Naiwieng 27 : Ka Me’gong Festival 2025 ba kyrshan da ka Sorkar Jylla, kala pynkhreh ban pynheh shuh shuh ia ka tamasa da ka jingwanrah sa ia u nongrwai pok-rock ba pawnam ka pyrthei u Richard Marx bad u Yellow Claw ha ka tamasa ban long ha Tura ha ka 5 bad 6 tarik Nohprah.
Ia kane la pynbna da ka Tnad Tourism ka Jylla-ka jingpynkhreh ia kane ka tamasa 2025 ka pyni ia ka jingpyrshang jong ka Sorkar ban rah ia ka nam jong ka ri-lum Garo kum ka jaka jngohkai ba kongsan ha Jylla kaba dap daka kolshor.
Kane ka tamasa- kaba la long kawei na ki tamasa ba heh ba pynlong manla u snem-kala sakhi ia ka jingwan poi palat 2.3 lak ki nongwan tamasa ha u snem 2024, kaba khring ia ki briew na kylleng ka ri India bad nabar ri ruh kumjuh.
Ka tamasa kan pyni nam ia ka jingriewspah ka thain ha ka kolshor, nalor ki jingput jingtem ki kynhun nongtem, ki jingialehkai, ka fashion show bad kiwei kiwei.
U Myntri Rangbah Conrad K Sangma ula ong ba kane ka tamasa kala nang pynkupbor ia ka thong jong ka Meghalaya ban pyniar shuh shuh ia ka ioh ka kot lyngba ka kolsjor, ban ai kamai jakpoh bad khring ia ki khmat ka pyrthei sha ki pateng jong ka thain.
Ka Me’gong kala kylla long ka rynsan kaba pyniakhleh lang ia ki nongput nongtem na ki ri ka pyrthei bad ka kolshor ki trai jylla, ki jingbam Garo, ki iew tiar shna kti, ki mar ba shna da ki siej bad kiwei kiwei.
Ha kane ka kynti, ka tamasa kan kynthup ruh ia ka nongrwai Bollywood ka Kanika Kapoor bad Neeti Mohan nalor ki nong rwai ka ri-lum ba kynthup ia ka Rough Road, Hoi Loi Makhi, Haatak Ladien bad ka Ranga bad Yellow Thie kiba dei na Ri-lum Garo.
Ia ki jingtip ba bniah ba iadei bad ka tamasa, ki ticket yn lah ban ioh na kawebsite ka Tnad Tourism bad ki Social Media jong ka tamasa.
