Shillong, Naiwieng 24 : Ka Champion jong ka Shillong Premier League-Langsning FC kala jop da 2-0 pyrshah ia ka Umlyngka SC ha ka jingiakhun sdang jong ka Shillong Sports Association Champions Cup 2025-ka lympung ialehkai ba dang thymmai, kaba sdang ha ka sngi Nyngkong ha madan SSA Stadium, Polo.
Ha kawei pat ka jingiakhun, ka Mawkasiang pyrshah ia ka Mylliem Lum ka la kut noh ha ka jingiakhadi kaba long da mar shi kol.
Ha ka jingialehkai ka Langsning bad ka Umlyngka, ki artylli ki kol ka Langsning FC ki dei kiba la ioh thep da u Wanshwadame Diengdoh (78’) and Donlad Diengdoh (84’).
Katba u Edmon Marngar (23’) bad u Eliastar Nongsiej (30’), ki long ki arngut ki player kiba la ioh ban thep ia ki kol na bynta ka kynhun ialehkai jong ka Mawkasiang bad Mylliem Lum.
Haba phai sha ka jingiakhun ka Langsning FC, lehse ka khmih lynti ba ka nam jop ba kan khur na kane ka jingiakhun pyrshah ia ka Umlyngka kan long da ka lynti kaba suk, hynrei kane ka kynhun kaba wan ba-ar na ka lympung ialehkai ka Third Division, kam shim la shu shah jem satia ialade, hynrei ka iai pynpaw ia la ka jong ka jingtbit bad khlain kat kum I buit I bor ba ka lah ba kan don ei.
Ia ka sur iakhun kaba tyngeh bad kaba dohiap bha na ka Umlyngka, ka la mihpaw ha ka kylla miet, kaba hangne kum ka kynhun, ka Umlyngka ka la pyrshang lem ba kan nion lem shakhmat, hynrei sniewbok ba I jingduna ha ka kynhun ka pynlong pat ia ka ba kam lah ba kan pynwandur ia kane ka sur ialehkai ka jong ka sha ka thong ban ioh ban pynkhih ia ka jar, hynrei kaba la lah pat ban iarap bad iada pat ia ka ban shah pynpei ia ka jar hakhmat ka Langsning dei u rang ap kol u jong ka, u Babitlang Wahlang, kaba bunsien u la lah shisha ban ieng ban iada bha ia la ka jong ka kol, kaba hangne ka la pynlong ia ka kynhun ialehkai ka Langsning ban kham trei shitom ban ioh ba kan thep ia kine ki ar kol ki jong ka.
Shwa ia kane ka jingiakhun, ka Mawkasiang kaba long ka lahduh jong ka Fourth Division, ka la rung shapdeng ka madan da ka jingkut jingmut kaba skhem bha, katno tam lei lei ba kan pyndonkam hok ia ka kabu ksiar ban ioh ban shim kylliang ia kumba 5 ngut ki rang ialehkai na ka kynhun ialehkai ka Mawlai, bad kane ka jingshim kylliang ka la treikam hadien ba u Fairming Suting, u la noh synniang sha ka kynhun da ka bol kaba u la pashat sha u Edmon ban ioh ban pynkhih ia ka jar.
Pynban na ka liang ka Mylliem Lum, kaba dei ka lahduh ka Second Division, ka ruh ka la pynkhlain ia la ka kynhun bad na ka por sha ka por ka la nion borbah bha ia ka kut ialehkai ka Mawkasiang.
Kumta ha kaba kut jong kine ki artylli ki jingiakhun ba sdang ka Champions Cup, ka kren shai kdar ba ki kynhun ne ki team na ki kyran kaba kham rit, kim dei satia kiba tlot, pynban haba ioh lei lei ia kat kane ka kabu ksiar, kum ka kynhun kim don eiei ban aidaw, hynrei ban mih madan bad ban iakhun tyngeh bad dohiap beit ban beh sha ka thong ban kynjoh shakhmat.
Lashai ka sngi, ka jingiakhun kan dei naka bynta ka Group B bad ha ka por 1 baje nohphai sngi ka lahduh ka First Division katta ka Nongkseh SS&CC kan mih madan ban aireng pyrshah ia ka kynhun ba wan ba-ar ka Second Division ka Laitkyrhong SC.
