Shillong, Naiwieng 24 : U President ka UDP bad Myntri Sorkar Bah Metbah Lyngdoh ula pynpaw ba u long uba kloi ban pdiang ia kano kano ka jingtohkit lada ka don ka jingpyndonkam bakla ha ka jingpyn treikam ia ki skhim MLA.
“Ngi pdiang ia kino kino ki jingtohkit lada ki paidbah ki iohi ia ki jingduna ne jingpyndonkam bakla” ong u Bah Metbah haba iakren bad ki lad pathai khubor ha ka sngi Nyngkong.
Haba kyntait ban kynthoh ia ka jingsngew jong kiwei ki seng sain pyrthei, ula ong “Ha nga shimet, kum u MLA ka Mairang, ngi ialeh ban long 100% kaba shai haba pyntreikam ia ki skhim-bad pynthikna ba ki pisa ki poi sha ki nongioh bynta”.
“Kum ki shakri paidbah, ngim dei ki bym don jingduna, ki jingbym biang ki don beit. Hynrei kam dei pat ban don ia ka jingmut ban bamsap lane pynduh ia ka hok”ula kynthoh.
“Ym don uwei ruh u MLA ban kam ba u biang lut nadong hadong-Ngi shaniah ha ki jingai jingmut jong ki Dorbar Shnong, ki seng Samla, ki Seng Kynthei ban pyntreikam ia ki skhim. Watla katta kum ki Nongialam, ngi kwah ban pynthikna ia ka jinglong ba shai ha ka jingpyntreikam ia ki skhim” ula bynrap.
