Rai ka MCTODA ban nym leit ujor sha ka MHRC halor ka huri hura ha lad Mawryngkneng

Shillong, Naiwieng 20: Ka Meghalaya Commercial Truck Owners & Drivers Association (MCTODA) kala rai ban ym leit mudui sha ka Meghalaya Human Rights Commission (MHRC) ne ban ujor ejahar ha kaba iadei bad ka huri hura ha Lad Mawryngkneng.

Haba iakren bad ki lad pathai khubor, u Bah Marngar ula ong “Bun kila ai jingmut ba ngim dei ban leit mudui sha ka Meghalaya Human Rights Commission (MHRC). Hynrei ngi lah rai ba ngin ym iaid shakhmat ban ujor sha ka MHRC ne ban ujor ejahar halor ka jingjia kaba la jia ha Lad Mawryngkneng. Ngi lah rai ban kiar ban ai ia kino kino ki jingujor. Kam pher lada ngi shah ktah kti haduh ban da iap ne ban shah kem. Ngim kwah ban kyrshan ia ka polisi ban ia phiah bad synshar ne ka ‘divide and rule policy’ hapdeng ki Khasi”.

Ula bynrap ba ka jingleh donbor palat ki pulit kadei kaba la leh da kito ki bym dei ki Khasi kiba la kren da ka ktien Hindi, ia kaba la sakhi da ki dkhot bad ki longkmie kiba die sha harud surok.

“Ka jingbom da u dieng Lathi kadei kaba la sdang da ki pulit ki bym dei ki Khasi, ia kane ngi tip namar ba ki iakren da ka Hindi. La pynbor ia ngi ban pynlong ia ka jingiakhih ban dawa ia ka hok ka jong ngi, ka jingiakhih ka jong ngi kam dei satia pyrshah ia ka sorkar hynrei pyrshah ia ki karkhana pynmih dewbilat”.

U Bah Marngar ula kynnoh ruh ba kala don ka jingiasylla hapdeng ka sorkar bad ki heh saipan kiba nabar ka jylla ban iaphiah ia ka jaidbynriew Khasi.

Ula pyntip ba ka Association kan pynlut pynsep ia ka bai sumar jong ki dkhot kiba la mynsaw ha katei ka jingjia.

“Ngi lah rai ba ngin siew ia ka jinglut jong ka bai sumar jong ki dkhot kiba mynsaw. Ngim kwah ban ujor ia kano kano ka ejahar namar ba ngi lah lap ba kala don ka jingiasylla hapdeng ka sorkar bad ki heh saipan kiba nabar ka jylla ban phiah bad ban synshar ia ka jaidbynriew Khasi”.

U Dkhot ka Association u Lamiki Rabon ula batai ba ula mynsaw ka kjat ha ka por ba dang pynlong ia ka jingiakhih.

Sa uwei pat u dkhot, Yomi Sutnga, ula ong “Ngi shim la dei satia ma ngi kiba la sdang, ha ka jingshisha kidei ki pulit. Haba ngi lah phah ia ki trok ban leitphai noh, ki pulit kila leit synran ia kitei ki trok. Hadien katto katne minit, ki pulit kila pyndonkam da ka lyer pynsat khmat bad ban tied da u lathi”.

U Marngar ula pynpaw ba ka rai ban kiar ban ujor sha ka MHRC, kadei namar ba ki don ia ka jingartatien ia ka rukom shim rai jong ka Commission bad ki sheptieng ba ki pulit ki lah ban don ka jingpynphai kylla kaba lah ban phiah ia ka jaidbynriew. “Balei ba ngin ym ujor sha ka MHRC kadei namar ba ngi sngew ba ka commission kan ym peit halor kitei ki mat kiba ngi mad. Kane kan pynmih pynban ia ka jingphiah hapdeng ki briew ki jong ngi”.