Shillong, Naiwieng 20: U Nongaibuit ka tnad ka Koit ka Khiah, uba long ruh u MLA ka seng UDP na Nongpoh u Bah Mayralborn Syiem ula rai ban pynbor ban kyntiew kyrdan noh ia ka Umshakhen Sub Centre sha ka PHC bad ban phah thung doctor noh mardor ha Umden PHC.
Haba iakren bad ki nongpathai khubor hynne ka sngi Balang, u Bah Syiem ula ong, ba ula lum ia ka jingialang jong ka tnad ka koit ka khiah ban pynkloi noh ia ka jingdawa kaba la slem ban kyntiew kyrdan noh ia ka Umshakhen Sub‑Centre sha ka Primary Health Centre.
“Kadei ka jingdawa kaba la don lypa bad ka jingangnud jong ki paitbah ka Raid Mathan hapoh jongka Nongpoh constituency,” ula ong bad ka bynrap ba ka jingtyrwa ban kadei kaba la don lypa bad ka sorkar jylla bad mynta ka tnad Planning ka dang ap ban ioh ia ka jingmynjur na ka tnad Finance.
Haba kren halor ka jingsngewkhia kaba la la pynpaw da ka Nongthluh Mathan Marmain Development Forum, u Bah Syiem ula ong ba ka Umden PHC kam shim la don satia ia u Doctor uba paka ne ban wan man la ka sngi mynta la bun bnai.
Ula iathuh ba ula shimkhia ia kane bad ka Director bad Commissioner jong ka tnad ka Koit ka Khiah, ha kaba ula kyntu ban shimkhia noh mardor ban phah ia u doctor uba pura.
“Ha kine ki sngi ban wan kan sa urlong noh ka jingthung ia u doctor bad nga kyntu ia ki paitbah ba kin long kiba iai shah shipor” ula pynthikna.
“Nga lah khmih bniah bha ia kane ka mat, nga lah iakren bad ka tnad bad u Myntri Sorkar uba dei khmih bad nga don ia ka jingkyrmen kaba skhem, ba ha kine ki sngi ban wan, yn sa ioh ia ka jingmynjur na ka tnad pla tyngka. Ha kaba iadei bad ka Umden PHC, nga lah kyrpad ban thung noh mardor ia u doctor na ka bynta ka jingmyntoi jong ki paitbah” la ong shuh shuh u Bah Syiem.
