Shillong, Naiwieng 19: Ki samla ialehkai kriket ka Meghalaya ki la sei borbah ban pynliem da 136 ron pyrshah ia ka Mizoram, kaba la biang pura ia ki ban rah ia ka nam kum ki lahduh ka lympung ialehkai jong ka BCCI’s State A Trophy 2025-26 plate group, ba la long ha Mohali, mynta ka sngi.
Kane ka kynhun ialehkai U-23 jong ka jylla, ka la iuh kjat ha kane ka lympung, ryngkat bad ka jinglah ka jong ka ba kan khur lynter ia ki nam jop da kaba kan jop shwa ia ki san tylli ki jingiakhun ba shakhmat bad bynrap lang pat ia ka phainal ba la long hynne ka sngi kaba da kane ka jingjop, joit kan pynlong ia kane ka kynhun ialehkai ka jylla ba kan jam sha ka kyrdan iakhun jong ka ‘elite group’ naka bynta ka samoi ialehkai kaban sa wan.
Haba phai sha kane ka jingiakhun, ka Meghalaya hadien ba ka la jop ia ka jingkynting pisa (toss) ka la kam trai ba kan tied nyngkong ha kaba, ka la lah ba kan kamai haduh 307 ron hadien ba ka la hap noh 7 wiket na ki 50 over.
U namtam napdeng ki nongtied (batsman) dei u Pushkar Raj Singh uba la lah ban kamai 105 ron bad ban iai neh haduh kaba kut, bynrap lang da ka 51 ron ba la lah ban kamai ia ka da u Dipankar Baruah bad ryngkat u Shavian Blah (74 ron na ki 54 tylli ki bol), kine baroh arngut ki la seng ia ka nongrim kamai ron paralok kaba 104 ron naka bynta ka wiket kaba ar, ia kaba la nang seng nongrim shuh shuh da ka jingkamai ron paralok naka bynta ka wiket kaba lai hapdeng u Dipankar bad u Pushkar, kiba la lah ban ia kamai 81 ron, kaba pynlong ia ka Meghalaya ba kan lah ba kan buh ia kne ka thong kaba eh bad ba jwat bha ia ka kynhun ialehkai ka Mizoram.
Haba la wan ban beh ia kane ka thong, ka Mizoram, ka la hap ban iaid ia kiba bun ki jingeh tad haduh ba kan da pyndem hi ngon ialade hadien ba ka la lah ba kan kamai tang 171 ron bad hap lut baroh ki wiket ki jong ka ha ka over kaba 43.
Ha kaba sdang eh jong ka jingiakhun, ka Mizoram ka la lah ba kan kamai 115 ron hadien ba ka la hap noh 2 wiket ha ka over ba 25, hynrei san kynsan saw tylli ki wiket ki la hap noh, kaba pynlong ia ki ban kamai tang 126 ron bad hap noh 6 wiket, kaba hangne, ka jingdonkam ban kamai ia ki ron ba dang sah (run rate), ka iai kiew na kawei ka over sha kawei pat, ha kaba u batsman uba la ieng ban iakhun dei tang u Tetea uba la lah ban kamai 41 ron, bad u prek ban sah khatduh ia ka synduk ka Mizoram ka wan hadien ba ka la hap baroh ki 4 wiket kiba dang sah ki jong ka hadien ba kan kamai tang 6 ron.
Kane ka jinglah ban pynhap kloi lan ia ki wiket ka Mizoram, ka jia long ba ka Meghalaya ka la pyndonkam lang ia ki pace bad spin, ha kane u Manish Sharma u la ioh ban khur 3/30, Shavian 3/51. Pushkar 2/13 bad Gavineal Marpna 2/22.
Ha kaba kut artad kane ka lympung u Dipankar, uba dang shu kyntiew ia u sha kane ka kyrdan iakhun, u kylla long u nongtied (batsman) uba ar ha kane ka lympung ban lah ban kamai haduh 254 ron na ki 6 tylli ki pali (innings) ba u la iakhun, bad ha ka liang ka bowling u Manish bad Shavian ki la ioh ban ia khur mar 11 tylli ki wiket, katba u Gavineal u la ioh ban khur 10 tylli ki wiket.
Ia kane ka kynhun ialehkai ka Meghalaya la coach bad btin lynti ia ka da u Neetesh Sharma bad u Shiva R Sangma kum u Assistant Coach bad ba la bynrap da ka jingiadon bynta lang ka jong Emidao Dhar (physio), Skhembor Khongbtep (trainer) bad Wonderful E Pakyntein (manager).
