Bthah ka Iingkashari ia ka Sorkar ban bud pyrrkhing ia ki ain pom dieng

Shillong, Naiwieng 17 : Ka Iingkashari Meghalaya High Court ha ka sngi Nyngkong, kala pynkynmaw biang ia ka hukum ba pynmih ha ka 9 tarik Iaiong, 2025 bad bthah bah aba iadei bad ka jingpom dieng bad jingioh ia ki jingbit ba donkam, ka Sorkar ka dei ban bud pyrrkhing bha ia ki Ain, ki kyndon bad ka Standard Operating Procedure (SOP) shuwa ban ai kano kano ka jingbit.

Ka Division Bench ba kynthup ia u Justice HS Thangkhiew bad Justice W Diengdoh ha ka hukum kala ong, “Namar kata, la khot biang ia ka hukum ba 09.04.2025”.

Ka Iingkashari kala pynshai shuh shuh “La dep ban pynshai ba ha ka kam ban pom ia ki dieng bad ka jingioh ia ki jingbit ba donkam, ki bor sorkar kin hap ban bud pyrrkhing ia ki Rules bad Act bad kumjuh ruh ia ki SOP shuwa ban ai ia ki jingbit” haba pyndep ia ki aplikeshon.

Ka hukum ba hashuwa kala thung ia ka Committee ban shong bishar ia ki aplikeshon na ka bynta ban pom ia ki dieng bad pynsangeh ruh shipor ia ka aplikeshon bala buh ha ka kaiphod ba iadei bad kane ka mukotduma.

Ka Sorkar kala aiti ia ka aplikeshon ban pynkylla, haba pynpaw ba ka jingthaw ia ka Committee ka long kaba ktah ia ka jingmyntoi u paidbah. Kala pynksan ba bun ki project ba bei tyngka na shabar bad ba hap pyndep hapoh ka por, kynthup ki jingtei jongka eco-tourism bad ki skhim rep-kila sahkut kaba ktah bad pynbun ka jinglut ha ka liang ka pisa tyngka.

Ka Sorkar kala pynpaw ba ka Meghalaya Tree (Preservation) Act, 1976, ki Rules jong ka, the Meghalaya Tree Felling (Non Forest Areas) Rules, 2006, bad ka Standing Operating Procedure (SOP) kila dep buh ia ki kyndon kiba khlain na ka bynta ban pom ia ki dieng ha ki jaka municipal, cantonment bad ki jaka bym long khlaw.

U Nongiasaid jong u nongmudui, ula pyrshah ia ka jingtyrwa ban pynkylla, da kaba ong ba kam don nongrim satia bad ba jingthaw ia ka Committee kam long satia kaba beain.

Ula pynpaw ba ka Sorkar kala dei ban tynruh ia ka Iingkashari ha katei ka por bad ba kane ka hukum ka dei kaba iaid kat kum ki jingbthah ka Supreme Court.

Ka Iingkashari kala pynpaw “ Kaei kaba pynkyndit ia kane ka Iingkashari ha ka sien ba nyngkong ka long ba balei ba ia kine ki Acts bad Rules bad ruh ka ‘Meghalaya Tree Felling (Non Forest Areas) Rules, 2006’ lem bad ki SOP, kiba la wanrah kat kum ka jingbthah ka Supreme Court bad bala treikam, ym shym la wanrah hakhmat ka IIngkashari ban pyni ba ki lad jingiada kila don lypa”.

Kala pynpaw ia ka jingshem ba ka hukum ba 9 tarik Iaiong kam shym la pynpaw satia ia kano kano ka jingsngew bala pynsngew da ka Sorkar haba iadei bad ki project ba dang sah bad ka jingktah jong ki ia ka jingmyntoi u paidbah.

Ka Iingkashari kala pynkut “Kumta ka paw ba ki bor ka Sorkar kim shym la shimkhia satia ban buddien ia kane ka kam ha ka lynti kaba dei, kaba khlem pep lehse kala wanrah ia kane ka aplikeshon”