Shillong, Naiwieng 17: Ka kynhun ialehkai ka Sikkim, ka la lah ba kan buh ia ka thong kaba eh bad ba jwat bha ia ka Meghalaya ha ka lympung ialehkai jong ka U-19 men’s Cooch Behar Trophy, ha ka jingiakhun kaba la long ha madan ialehkai jong ka MCA, Polo.
Ha lyndet ka jinglah jong ka Sikkim ba kan buh ia kane ka thong ka wan hadien ba u kapten u jong ka, u Denree Lepcha u la lah ban kamai 150 ron, kaba la la wan hadien ba ka Sikkim kaba la sdang ia ka pali ka jong ka na ka 46 ron hadien ba ka la hap noh 2 wiket, ka la lap ba hap noh baroh ki wiket ki jong ka hadien ba ka la lah ba kan kamai 291 ron, bad kane ka pynlong ia ka Meghalaya ba kan donkam ban beh ia ka thong kaba long 260 ban jop ia kane ka jingiakhun.
Tad haduh ba la kut jong ka sngi kaba ar, ka Meghalaya ka la lah ba kan kamai 53 ron hadien ba ka la hap noh 3 wiket bad donkam sa kumba 207 ban jop ia kane ka jingiakhun.
Haba shim kyllum jong ka sngi kaba ar, ka Sikkim ka la lah ba kan bet bha, katno tam lei lei na u Denree Lepcha uba la lah ban kamai ia kane ka 150 ron ba la wan na ki 198 tylli ki bol bad ba u la ioh ruh ia ka jingkyrshan na u Sahil uba la lah lem ban kamai 51 ron na ki 164 tylli ki bol bad kine baroh arngut ki la lah ban seng ia ka nongrim kamai ron paralok kaba 105 ron na ka bynta ka wiket kaba saw .
Na ka liang ki nong kawang bol (bowler) ka Meghalaya u Mewankitbok Kharpuri u la ioh ban khur 3 wiket naka bynta 48 ron na ki 19 over bad haba khein kyllum tang ha kane ka jingiakhun u la ioh ban khur 8 wiket naka bynta 65 ron, bud pat sa u Rudra Singh Rathor (2/44) bad Paisal Ali (1/13) u Gaurav Narleng (2/22).
Kane ka jinglah ban bet bha, ka la ai mynsiem bha ia ki rang ialehkai ka Sikkim, ha kaba I kumba ki la ioh jingim bha, da kaba ki iai bteng ban ia kren ia khna ia pyrta hapdeng para player, ha ka por ba ka Meghalaya ka la wan ba kan beh ia kane ka thong.
Ki lai tylli ki wiket kiba ka Meghalaya ka la lap ba duh noh ha ka jingwan beh ia ka jong ka ia kane ka thong dei jong u Ruda uba la lah ban kamai tang 2 ron, u Bishesh Chettry ba la kamai 21 ron, bad u Dipayan Nand 19 ron.
Kumta ka sngi kaba lai kan dei ka sngi ba kongsan ia ki batsman ba dang sah ka Meghalaya ban bteng ia la ka pali ka jong ki ban wan beh ia kane ka thong.
