Shillong, Nailur 16 : Ka Sorkar Pdeng kala iai pynbor ia ka Sorkar Jylla ban pyntrei noh ia ka Railway project ne ka lynti rel ha Jylla Meghalaya.
Ia kane la pyntip da u Myntri Rangbah ka Jylla Conrad Kongkal Sangma bad u Myntri ka Tnad Transport Bah Dasakhiat Lamare haba jubab ia ka jingkylli halor kane ka kam hapoh ka Iingdorbar Thaw Ain hynne ka sngi thohdieng.
Lah ban kdew ba ka Sorkar Pdeng kala tyrwa ban pyntrei ia artylli ki lyntei rel ha Jylla ba kynthup ia ka Tetelia-Byrnihat kaba jrong 22 km bad ka Byrnihat-Shillong kaba jrong 108 km.
Ka Tetelia-Byrnihat project ka dei kaba la buh ban pyntrei ha ka jinglut jingsep ba kot T.496 klur hynrei kane ka project kam shym la urlong namar ka jingieng pyrshah jong ki kynhun bapher bapher kiba dawa ban wanrah shuwa ia ka ain ba pyrrkhing ia ka jingwanrung kyrthep ki bar Jylla.
“Ka don ka jingpynbor kaba jur ia ka Sorkar Meghalaya ban pyntrei ia ka lynti rel. Hynrei, nga la pynpaw hakhmat u Myntri ka Tnad Lynti Rel (haba nga iakynduh hynriew bnai mynshuwa) halor ki jyrwit jyrwat jong kane ka project bad ula kren shai ia nga ba ka Sorkar Pdeng kan sa pyntrei ia kane ka project hadien ba ka Sorkar Jylla bad ki paidbah kila mynjur namar ia kane ka project la wanrah na ka bynta ka jingmyntoi ki paidbah” ong u Conrad.
Haba pynpaw ba ka sorkar ka angnud eh ban pyntrei noh ia ka lynti rel, u Myntri Rangbah ula ong “Nga la pyntip sha ka Sorkar India ba ngin sa pyntyllun shakhmat ia ka kam hadien ka jingiakren bad ki kynhun bapher bapher jong ka Jylla. Ngi kwah eh ban pyntyllun shakhmat hynrei yn leh ia kane hadien ba la ngi ioh lang ia ka jingmynjur ki paidbah”.
U Conrad u pyntip ba ka Assam kala pyntrei shaid shaid haba phai sha ka jingpyntrei ia ki lynti rel na Tetelia sha Byrnihat hynrei namar ka jingjia kaba jia ha ka por bas dang pyntrei ia ka project ha Meghalaya, kane ka kam kala sakut noh.
U Conrad u pyntip ba ka Sorkar kala dep shong jingialang bad ki katto katne ki kynhun ba lada long, yn pyntrei noh ia ka lynti rel tang jong ki rel kit mar kit mata haduh Byrnihat khnang ba kan myntoi ka Jylla.
“Ka don ka kynja jingiateh soskular halor ki rel kit mar hynrei ka don ka jingpyrshah kaba jur ia ki rel kit briew” ula ong haba bynrap ba ula kyrpad ruh ia u Myntri ka Tnad Railway barim ban buh ia ka check point ha Mendipathar Railway Station khnang ban lah wanrah ia ka jingshaniah jong ki paidbah ka Jylla.
U Conrad ula pyntip ba ka Sorkar Jylla kala shim ruh ia ki sienjam ban leh eiei halor ka jingwan rung kyrthep ki bar Jylla da kaba pynkylla thymmai ki kyndon jong ka Meghalaya Resident Safety and Security Act (MRSSA) bad mynjur ruh ia ka Resolution ban pyntreikam ia ka Inner Line Permit (ILP) kaba dang ap ia ka jingai jingmynjur ka Sorkar Pdeng.
Halor ka jingkylli bala wanrah da u MLA ka Nongpoh Bah Mayralborn Syiem,u Bah Dasakhiat ula ong “Kila don shibun ki jing pynbor n aka Sorkar India ban pyniaid shakhmat ia ka project hynrei ngi hap ban pyrkhat ia ki jingpyrshah bad hap iakren bad ki kynhun bapher bapher nalor ban pyrshang ruh ban pynioh lang ia ka jingmynjur jong ki.
U Myntri u pyntip ba namar ka jingpyrshah, haduh mynta ym pat shym la pyntrei khyndiat ruh ia ka kam bad kam pat don ruh ka jingmang tyngka ia kane. U pyntip ba ka survey kala dep naduh Tetelia sha Byrnihat haduh Lailad.
