Guwahati, Naiwieng 11: Hadien ka jingbthei bomb ba shyrkhei ha Delhi’s Red Fort Metro Station, ha kaba phra ngut ki briew kila duh ia la ka jingim ba kordor bad pynmynsaw ia kiba bun, ka Sorkar Assam mynta kala hukum ia ki bor pahara ban pyrkhing bad peitngor bha ha kylleng ki jaka jong ka jylla.
U Myntri Rangbha ka jylla Assam u Himanta Biswa Sarma ha ka sngi Nyngkong u la bthah ia ki pulit ka jylla ba kin pynkhlain ia ka jingpeit bniah bad ruh ban leh da kaba tyngeh ia ki riew shimet na Assam kiba pynpaw ka jingkyrshan ia katei ka jingshah thombor ha ki rynsan social media.
“Ngi la ithuh ia ki katto katne ngut ki briew kiba la buh ne post ia ki jingthoh bad ki emojis kiba la iaraoh ia ka jingpynbthei bom ha Delhi. Kum kine ki jingleh ki kyntiew ne iarap beit beit ia ki kam lehnoh”, la ong u Sarma haba kren sha ki nongthoh khubor. “La pynshisha ia ka jinglong jong ki, bad lada ki dei na Assam, kin iakynduh ia ka jingshah kem bad jingshah pynngat ha ki ain pyrshah lehnoh kiba pyrkhing bha.”
U Myntri Rangbah u la ong ba u la bthah ia u Director General of Police (DGP) ban peitngor bad buddien bha ha ki rynsan social media bad ruh ban leh da kaba tyngeh ia kino kino kiba pynphriang khubor lamler ne kiba sngew synei ia ki khynhun lehnoh.
“Lada don kiba rakhe ne lehkmen ïa ka jingshah thombor ne ka jingduh noh ïa ki mynsiem ba kordor bad kiba lui lui, ki ïadon bynta ha ka liang jong ki kam lehnoh — bad ngin leh da kaba tyngeh,” u la pynskhem.
Ha kajuh ka por, ki Pulit ka Assam kila kem noh ia u principal ba la shongthait jong ka skul sorkar u Nazrul Islam Borbhuyan uba dei na Durgapur, uba la shah kynnoh ba u la post ia ka jingkynthoh kaba long pyrshah ha ki social media ha kaba iadei bad ka jingbthei bom ha Delhi.
Katkum ki tyllong khubor na ki pulit, la kynnoh ba u Borbhuyan u la pynlong politik ïa kane ka jingjia, da kaba kynthoh ba “ki elekshon ki dang wan” — kaba mut ba ka don ka jingïadei hapdeng ka jingbthei bom bad ka elekshon ka ban sa long ha Bihar.
“Ka jingthmu ba sha lyndet jong katei ka jingkynthoh ka dang don mynta ha ka jingtohkit ban tip la ka dei kaba don jingthmu ha ka sain pyrthei ne kaba thmu ban pynmih jingkulmar ia ki paidbah”, la ong u heh pulit.
Ki Pulit ki la sam ruh ia ka screenshot jong katei ka post,Kaba i kumba ka don jingiadei ia ka jingbthei ha Delhi bad ka sain pyrthei election.
Ki ophisar kila on gong ba ki bor pahara ne ki security agencies ha Assam la bthah ba kin long kiba peitngor ha ki jaka leit jaka wan ki paidbah, ha ki jingialang paidbah namar ka jingma kaba lah ban mih na ka jingbthei bom ha Delhi.
U Sarma u la pynpaw biang ba ka Assam kan pynneh ïa ka zero-tolerance policy ban ym shah ïa iano iano ba kin don ka jingsngew na ka bynta ki lehnoh ne ka online radicalisation.
“Man uwei pa uwei pa uwei ki nongshong shnong u dei ban ieng tylli kawei ban iakhun pyrshah ia kum kine ki kam pyntriem.Kano kano ka jingpyrshang ban pynksan ne pynkhraw ia ki yn nym shah”, la ong u myntri rangbah ka jylla.
