Amlarem, Naiwieng 10 : U Myntri Rangbah ka Jylla Conrad K Sangma ha ka sngi Nyngkong, ula pynbna ba ka Sorkar kan thaw ia ka Mini Secretariat ha Amlarem Civil Sub-Division.
Ula pynbna ia kane haba kren ha ka jingialang plie ia ka jingrakhe jubili ksiar ba shisnem pura jong ka Amlarem Civil Sub-Division.
“Ngi la iakren bad shim rai ba ngin mang ia ka Mini Secretariat ha Amlarem. Ai ba ngan kular ha phi ba ia ka jingmang yn sa leh noh kham kloi kat kaba lah, bad nga kwah ban iohi ba ki kam kin sdang hapoh kane kane ka jingrakhe ba shisnem, ha kaba ngin rakhe ruh ia ka jingsdang ban tei ia ka Ophis jong ka Mini Secretariat hangne ha Amlarem. Ka dei kawei na ki Sub-Division kaba la rim tam bad ka dei hok ban ioh ia ka Mini Secretariat” ula ong.
U Conrad ula pynbna ruh ia shibun ki kam bha lang bad ki jingtei pynheh ia ki jingtei ba pyndonkam u paidbah ha ka thain Amlarem Sub Division. Ula pynbna ba ka Sorkar kan mang T.16 klur ban kyntiew kyrdan ia ka rukom sam umbam umdih ha ka thain.
Nalor kane, ula pyntip ruh ba halor ka jingkyrpad jong u MLA, ka Sorkar kala ai jingmynjur ia ka song pisa na ka bynta ban tei ia ki surok shnong hapoh ka thain Amlarem Sub-Division.
“Nga kyrmen ba hapoh kane ka jingrakhe ba shisnem, ki jingpyntrei ia ki kam ban pynbha ia ki surok shnong ki dei ban dep noh” ula ong.
Ula bynrap ba ki don ruh kiwei ki kam ki ban sa pynkhreh na ka bynta ka thain hynrei ia mynta, lai tylli ki mat ba hakhmat eh jong ka Sub-Division ki dei kiba la shimkhia ban leh eiei da ka Sorkar.
Ula pybna ruh ban synniang T.20 lak na ka CMSG na ka bynta ka jingrakhe ia ka jubili ksiar.
