Shillong, Naiwieng 07: Ka Shad Nongkrem kaba dei ka shad tynrai jong ki jaidbynriew Khasi kala kut noh hynne ka sngi da ka jingkmen bad da ka jingiphiuh ipheng ha ïingsad, kaba don ha Smit.
Ia kane ka shad lehniam la pynlong kum shi bynta ban ainguh ia ka Lei Synshar ban ioh ia ka jingkyrkhu ha ka rep ka riang bad ka bit ka biang jong ki paidbah.
U Syiem ka Khyrim ryngkat bad ki Lyngdoh kila pyndep ia ka lehniam Pomblang, ha kaba la pom ia u blang kum shi bynta jong ka jingainguh ia u Lei Shyllong bad kumjuh ruh ia ki longshwa manshwa na ka Kur kaba ialam ia ka jingsysnhar.
Ka bynta jong kane ka jingshad niam kadei da ka jingiashimbynta ki thei sotti ha kaba kila riam la beit tynrai ban mih ha ka lympung ban shad ha kane ka sngi kaba kyrpang.
Nalor kane ki samla shynrang ruh kila ia shad ha ka jaka shad kaba don hakhmat jong ka ïingsad ha kaba kila bat ha kti ia ki waitlam bad u Symphiah, da kaba pynleit jingmut bad shah shkor ruh ia ka jingsawa kaba mih na ki ksing bad ki tangmuri.
Ki paidbah na kylleng ki bynta jong ka jylla kila wan ban sakhi ia kane ka shad bad la sakhi ruh ia ka jingbuh ia ki dukan shabar jong ka iingsad kaba la nang pynshongshit shuh shuh.
Ha ryngkat bad ka riam itynnad ki paidbah kila leit ban sakhi ia kane ka shad kaba shisien shisnem bad kala don ruh ka jingpyninam ia ki jingthain kti ki bapher bapher bad ia ki jingbam bapher ha kane ka jingrakhe bad jinglehkmen kaba shisien shi snem.
La bun snem kane ka Shad kala khring ia ki nongjngohkai kiba kynthup na kylleng ki bynta jong ka jylla bad wat ia kiba nabar ri ruh.
U Syiem u ka Hima Khyrim u Dr Balajied Syiem ula riam tynrai bad pyniaid ia kane ka lehniam lehrukom.
Kane ka jinglehniam kaba san sngi kala long ha ka ‘Iing Sad’ ka jaka sah jong ka
Syiem Sad, ka Mahadei ne ka Kmie jongka Khun Syiem ka Khyrim.
Hashwa kane u Dr Balajied S Syiem ula ong, “Ngi lah pynneh bad pynheh pynsan ia kane ka jingriewspah jong ka shad tynrai kumba la pynkhamti da ki longshwa manshwa. Kum ki nongioh pateng ia kane ka kolshor kaba la rim, kumta ka long kaba donkam kyrkieh ban iada ia ka jinglong tynrai watla kila don ki jingkylla kumba la sakhi ha kane ka juk kaba mynta ha kylleng jong ka pyrthei”.
Ia kane ka shad la wan ban sakhi da u Symbud Myntri Rangbah ka jylla u Bah
Prestone Tynsong, ka Nongaibuit jong ka Sorkar MDA ka Kong Ampareen Lyngdoh, u MLA ka Nongkrem u Bah Ardent Basaiawmoit bad kiwei kiwei.
