Shillong Naiwieng 05: Ka jingtei ia ka Meghalaya Legislative Assembly kaba thymmai kala iaid shakhmat bad la khmih lynti ba yn pyndep ha u Jylliew 2026, pynbna da u Lamphang ka iingdorbar thawain ka jylla u Thomas A Sangma ha ka jingialang kaba la long hynne ka sngi ha kaba la iadonlang u Symbud Myntri Rangbah ka jylla u Bah Prestone Tynsong.
Ka thong kaba la buh nyngkong kadei ban pyndep ha u Lber 2025, hynrei ki nongshna kila pan por ban pynjlan sa 6 bnai ban pyndep ia ki jingshna ha ki bynta ba shapoh jong ka iing dorbar kynthup ia ka main hall, jaka pdiang briew bad ki jaka shongkai.
Ban pynthikna ba kane ka kam yn pyndep ha ka por kaba la buh, yn lum ia ka jingialang man la ka bnai bad ia ka jingialang kaban wan yn sa pynlong ha ka 8 tarik u Nohprah 2025.
U Sangma ula pynpaw ia ka jingkhmih lynti ba ia ka Dorbar Synrai jong u snem 2026 yn sa pynlong noh ha ka iingdorbar kaba thymmai kaban don ia ki kor ki bor kiba thymmai bad paka, ka jingpyndiat ia ki kor ha kaba iadei bad ka jingshngain bad kiwei kiwei.
Ka jingshna pynwandur thymmai biang jong ka Dome kadei kaba la leh ban pynduna ia ka jingkhia jong ka tnum bad kadei kaba la khmih bniah da ka IIT Guwahati bad IIT Roorkee.
Kane ka projek ka kynthup ia ki bynta kiba kongsan bad ia ka DPR la dep ban pynkhreh na ka bynta ka wat ka baar, kaba kynthup iaka jingtei ia jaka sah jong ki nongtrei ne Staff Quarter bad kiwei kiwei ki jingdonkam.
La phah ruh ia ki jingtip sha ki tnad jong ka sorkar pdeng na ka bynta ban ioh ia ka jingmynjur.
