Guwahati, Naiwieng 3: Ka jingklumar ba shyrkhei kynsan kynsan kala mih ha shi lynter jong ka khappud India-Bangladesh ha ka thain Sribhumi, hadien ba ka kynhun ki nong Bangladesh kila pyni bor ia ki shipai iada khappud ki Border Security Force (BSF) hajan jong ka Bhanga–Harinagar sector.
Katkum ki report, kane ka jingjia kala jia ha shi lynter jong ka khappud kaba pynia khlad ia ka Cachar bad ka Karimganj District jong ka jylla Assam bad ka Sylhet District jong ka ri Bangladesh bad khamtam eh ia ka thain Rasulpur kaba hap hapoh ka Ward No. 9 jong ka Manikpur Union, Jakiganj Upazila.
Ka tyllong khubor la iathuh ba kine ki nong Bangladesh kila rung jubor shapoh u pud u sam jong ka ri India ban rep jhur ha ka jaka kaba don marjan bad ka Wah Surma.
Ka kynhun jong ka 170th Battalion jong ki shipai BSF hadien ba kila iohi ia kine kiei kiei, kila leit sha katei ka thain bad ban pynpaw ka jingpyrshah halor kane ka jingrep jhur ka jong ki.
La iathuh ba ki shipai BSF ki la pynpra ia ki jingker ba la shna da ki siej, ki jaka sah ba shipor, bad kiwei kiwei ki jingtei ba shipor ba la tei ha katei ka jaka.
Katei ka jingleh ki BSF, la kynnoh ba ka la pynbitar ia ki nong Bangladesh, kiba la ia lum paidbah bad ialeh pyrshah ia ki BSF, da kaba pyrta da ki kyntien bein bad pyrta pyrshah ia ki shipai India.
Kham hadien, ki paidbah nongshong shnong kiba bun bah ki la ïalumlang shi jaka ha ka bynta khappud jong ka ri Bangladesh, bad kila pynmih da ki jingpyrta pyrshah ïa ka India.
Ha ki rynsan social media ha Bangladesh ki la dap bad shlei da ki jingthoh kiba kam ba ki BSF ki la rung jubor sha u pud u sam jong ka Bangladesh, ha kaba don kiba pynpaw ba kin pynphai kylla biang lada kum kine kin jia biang.
Wat hapdeng ka jingpynshit bad pynkhihwin, ki shipai BSF ki long jai jai ban bat ia la ka jong ka jaka khlem da kynran dien, da kaba pynthikna ba ka jinglong jingman kan ym long ka ban ym lah teh lakam shuh.
Hadien katei ka jingjia, la pynlong ia ka flag meeting hapdeng ki shipai Border Security Force (BSF) bad ki Border Guard Bangladesh (BGB) ban pynjem ia ka jingkulmar. La iathuh ba baroh arliang ki la iakren ia ki lad ki lynti ban iada na kum kine kiei kiei bad ruh ban wanrah bad pynneh ia ka shong shuk shong sain ha shi lynter ka international boundary.
Hynrei ki khubor na ki thaiñ khappud jong ka Manikpur ha Jakiganj ki pyni ba ki nongshong shnong na Bangladesh ki dang bteng ban pynkhih ïa kane ka jingïakynad, ha kaba ki ialum lang ha ryngkat bad ki jingkren pyrshah India ki dang ïai bteng ha kane ka thaiñ.
Ki bor ba dei khmih na baroh ar tylli ki ri ki dang buddien bha ïa ka jinglong jingman ban ïada na kano kano ka jingpynkheiñ ïa ka jingsuk ha shilynter u pud u sam.
“Ka jingïakynad hapdeng ki shipai BSF bad ki nong Bangladesh ka la jia ha ka thaiñ khappud hadien ba katto katne ngut ki nong Bangladesh ki la kam sha shilliang pud bad pyrshang ruh ban kam trai ia ki jaka jong ka India.Ki la pyrshang ban pyndonkam ïa ka jaka jong ka India na ka bynta ban rep. Hadien ba ka um wah ka la hiar, ki jaka ki la paw sha jrong bad ki briew na Bangladesh ki la wan ban kam trai ia ki jaka jong ka India,” ong u DIG, BSF, Mizoram Cachar Frontier.
U la ong, “Ka dei ka Zero land bad ka dei jong ka ri India. Ka dei ka khappud kaba don harud wah bad dei na kata ka daw ba kum kane ka jingeh ka mih.Ki la kam, bad ki BSF jong ngi ki ruh ki kam mar kylliang. Kala don ka flag meeting bad kawei pat ka jingialang kan sa jia mynta ka sngi,”.
