Shillong: Ka Rangdajied United FC ka la lah ba kan pynliem ia ka Nangkiew Irat SC da 3-0, ha ka jingiakhun kaba la long hynne ka janmiet, ha SSA Stadium, First Ground, Polo bad kane ka la biang pura ia kane ka kynhun ba kan jam pat sha ka semifinal jong ka Super Cup.
Ia kine ki lai kol jong ka Rangdajied United FC la thep ia ki da u Benny V Khriam, na ka bol kaba la iarap ban pashat sha u da u Pasborlang Khonglikong, bad ia ki ar kol kiba sah la wan lyngba ka dur ka penalty ia kaba la thep ia ki da u Dibormi Kassar , ha ka minit kaba ka 73 bad kaba 85.
Ka Super Cup, ka dei ka lympung ialehkai ba thymmai ka the Shillong Sports Association, kaba long kum shi bynta ban kynrong shuh shuh kham shalor ia lympung ialehkai, kum shi bynta ban khring shuh shuh ia u paidbah nongwan peitkai, ha kaba tang 6 tylli ki klob ne team Shillong Premier League 2025, ki ioh ia ka kabu ba kin iakhun sa ha kane kawei pat ka lympung.
Ka Nangkiew Irat bad ka Rangdajied United FC ki jam sha kane ka lympung iakhun hadien ba ki la lah ba kin bat ia ka kyrdan kaba saw bad ba san ha ka SPL.
Da kane ka jingjop kaba hynne ka janmiet, ka Rangdajied kan khreh ba kan iakhun pyrshah pat ia ka Langsning FC ka kynhun kaba rah ia ka nam lahduh jong ka SPL.
Ha kaba kut jong kane ka jingiakhun, ka nam t7 Player of the Match ka leit sha u Mebanshngain Kurkalang ha kaba u la ioh ba un pdiang ia ka momento bad kumjuh ia ka song pisa kaba san hajar tyngka, ia kaba la sam ia ka da u Working President ka SSA bah Robert Dkhar.
Lashai ka sngi, ka jingiakhun kan long hapdeng ka Mawlai SC kaba bat ia ka kyrdan kaba lai pyrshah ia ka Sawmer kaba bat ia ka kyrdan hynriew ha ka SPL, kaban long ha ka por 5 baje janmiet, ha kaba ki nongjop na kane ka jingiakhun kin pynkhreh ban aireng pat ia ka Shillong Lajong ha ka semifinal kaba ar jong kane ka lympung.
