Shillong, Nailur 15 : U MLA ka Mawlai Bah Process T Sawkmie hynne ka sngi palei, ula kyntu ia ka Sorkar Jylla ban wanrah biang da ka Resolution hapoh ka Iingdorbar ban pynkynmaw ia ka Sorkar Pdeng halor ka jingdawa pyntreikam ia ka Inner Line Permit (ILP) hapoh ka Jylla.
Haba wanrah ia kane ka mat iatai ha Iingdorbar Thaw Ain, u Bah Process ula ong ba arsnem kala iaid ka por naduh b aka Iingdorbar kala mynjur ia ka Resolution.
“Nga sngew ba kan bha shibun lada ka Sorkar ka wanrah da ka Resolution ban pynkymaw ia ka Sorkar Pdeng halor kane ka kam” ula ong haba kdew ba ka Jylla Manipur kala mynjur ia ka Resolution ILP haduh lai sien kynthih.
Haba kyntu ban iai buddien ia ka kam, u Bah Process ula ai jingmut ia ka Sorkar ba kan kyntu ia ki MP na ka Jylla ba kin iakren lem bad ka Sorkar Pdeng.
Haba jubab, u Myntri Rangbah ka Jylla Conrad Kongkal Sangma ula ong ba ka Sorkar ka dang ap ia ka jubab na ka Ministry of Home Affairs (MHA) ka Sorkar Pdeng halor ka Resolution bala mynjur da ka Iingdorbar ha u snem 2019.
U Conrad u pyntip ba ka Sorkar Jylla kala shim ia baroh ki lad ki lynti kiba don ban kyrpad ia ka Sorkar Pdeng ba kan bishar ban mynjur ia ka jingtyrwa ka Jylla.
U Myntri Rangbah ka Jylla ula ong ba ka Sorkar kala pyni ia ka jingshimkhia halor kane ka kam da kaba wanrah bad mynjur ia ka Resolution myn ha ka 19 tarik Nohprah 2019 bad la phah ruh ia ka sha ka Sorkar Pdeng ha ka 3 tarik Naiwieng 2019.
“Hadien kane, nga la leit buddien hi shimet bad ka Sorkar India bad nga la thoh ruh haduh artylli ki shithi sha u Myntri kam Pohiing u Amit Shah nalor ka jingaiti ia ka dorkhas da ka Kyhun Myntri ha ka por ba u wan iashimbynta ha ka jing ialang jongka NEC ha Shillong” ula ong.
U Conrad ula ong “Ngim pat shongthait halor kane ka kam. Ka jingiakren ka dang iaid shakhmat bad ka donkam ruh ia ka jingpynbteng ia ki jingiakren bad ka Sorkar India”.
U Conrad ula kular ruh ba ula buh jingthoh ia ka jingai jingmut jong u Dkhot haba ong ba ki MP ruh ki ju iakren ia ka jing dawa ILP bad ka Sorkar Pdeng.
