Shillong, Risaw 29 : U Heh ka AICC ba khmih ia ka Meghalaya Dr A Chellakumar ha ka sngi Balang, ula kam ba bun ki briew naki seng sain pyrthei ba don ha ka Liang Synshar, kila pynpaw ia ka jingkwah ban wan iasoh noh sha ka Congress bad yn sa pynrung dkhot ia ki ha ki sngi ban wan.
“Bun ki briew na ki seng sain pyrthei ba don ha ka liang synshar kila dep ai ktien ba ki kloi ban wan phai pat sha ka congress” ong u Dr Chellakumar haba iakren bad ki nongthoh khubor. Ula ong ba tang ha kine ki sngi ban wan, iwei hadien iwei, ngin sa pynrung ia ki bad ynda poi katei ka por, phin sa iatip ia kane.
Shuwa kane, u Dr Chellakumar ula pdiang sngewbha ia u jingwanphai biang u MLA barim ka Rangsakona Zenith Sangma haba pynpaw “U dkhot barim ka Iing” uba la noh synniang shibun eh ia ka congress.
Une u Heh AICC ula ong ba u Zenith ula ieh ia ka congress tang khyndiat por bad mynta ula sngewthuh ba kane ka party ka dei ka rynsan kaba biang eh ban bat ia ka nongrim ka jingialong kawei bad ia ka riti synshar ka Ri.
Haba pdeng ia u Zenith bad ki dkhot thymmai, u President ka MPCC Bah Vincent H Pala ula ong ba kine ki dkhot thymmai kila wan iasoh sha ka congress ban iakhun ia kawei ka bor bad ban iatreilang naka bynta ka jingkiew shaphrang ka party.
Da ka jingwan iasoh kine ki dhot thymmai, u Bah Pala ula pynpaw ia ka jingsngewskhem ba ka congress party kan nang khlain bad ban trei na ka bynta ka jingkiew shaphrang ka Jylla bad ka Ri.
