Shillong, Risaw 29: Ka kynhun ki thei ialehkai U-19 Cricket ka Meghalaya ki la lah ban pynliem noh ia ka Arunachal Pradesh ha ka lympung ialehkai jong ka U-19 Women’s T20 Trophy 2025-26 plate group, kaba la long ha Lucknow mynta ka sngi.
Ha lyndet kane ka jingjop ka kynhun ki thei ialehkai ka jylla, ka la wan lyngba ka jingialehkai bha ka Cheanchi Kambesa Sangma, kaba la pynlong syndon ia ka kynhun ban jop ia ka Arunachal da 31 ron.
Ha kane ka kynti iakhun, na ka liang ka Cheanchi ka la lah shwa ba kan kamai 30 ron bad ban iai neh haduh ba kut jong ka pali bad hadien kane, ka la iarap ba kan khur pat 3 wiket naka bynta 12 ron ha ka pali kaba ar, kaba la biang pura ia ka kynhun ialehkai ka Meghalaya ba kan khur ia ka jingjop kaba nyngkong ka jong ka ha kane ka lympung, hadien ba ka la mad shwa ia ki artylli ki nam rem na ki jingiakhun ba shakhmat ha ka Sikkim bad ka Manipur.
Ka khana jong kane ka jingiakhun ka long ba ka Arunachal kaba la jop ia ka jingkynting pisa (toss) ka la ailad shwa ia ka Meghalaya ba kan wan ba kan bet, kaba hangne ka Monica Singh ka la lam khmat ia ka kynhun ban kamai 27 ron na ki 24 tylli ki bol, bad bynrap lang sa ka Jayshee Singh 14 ron na ki 32 tylli ki bol bad ka ka Cheanchi 30 ron na ki 39 tylli ki bol, ka la seng ia ka nongrim kamai ron kaba long 91 ron naka bynta 6 wiket ia ka Meghalaya na ki 20 over.
Wat lada ka thong ka lah ban long kaba rit, pynban ka la plie lad ia ki thei kawang bol jong ka Meghalaya ban mih madan da ka mynsiem ban iakhun ha kaba ki la lah ban pynhap ia ki 9 tylli ki wiket ka Arunachal hadien ba ka la lah ban kamai tang 60 ron na ki 20 over, ha kaba ka Kino Nanung marwei ka la lah ba kan kamai 20 ron.
Nalor ki 3 tylli ki wiket ba la khur da ka Cheanchi, ka Jayshree ruh ka la lah lem ban khur 3 wiket naka bynta 9 ron na ki 4 over bad bynrap lang sa ka Fennysha Nongrum bad ka Banchila R Marak kiba la ioh ban ia khur lem mar shi wiket ban pynlong ia ka Meghalaya ban khur ia kane ka nam jop.
Ka jingiakhun kaban wan ia ka Meghalaya ha kane ka lympung kan long pyrshah ia ka Nagaland ha ka sngi Thohdieng.
