Shillong, Risaw 27: Ka East Khasi Hills ka la ioh bat biang ia ka nam lahduh jong ka Overall Champion haka thup shynrang bad kynthei ka 31st State Karate Championship 2025.
Ia ka lympung ba lai sngi lynter, kaba la pynlong ha JN Indoor Stadium, Polo da ka All Meghalaya Karate-Do Association (AMKA) lyngba ka jingkyrshan na ka Directorate of Sports and Youth Affairs.
Ha kane ka lympung ki don 512 ngut na ki 8 tylli ki District ki la wan ïashim bynta mynta u snem, kaba long ka jingkiew na ka jingkheiñ jong u snem 2024 kaba long 456 ngut.
Ka West Khasi Hills ka la wan ba-ar ha ka liang ki shynrang bad ka Ri-Bhoi ka wan ba-ar ha ka liang ki kynthei.
U Myntri Sorkar u Bah Sanbor Shullai uba long u kongsan ha kane ka sngi pynhap pyrda u la ai ka jingïaroh ïa ki samla namar ka jingaiti lut jong ki ha ka jingïalehkai ba ki la jied.
U Bah Sanbor u la ai khublei ruh ïa ki kmie ki kpa kiba la kyrshan ïala ki khun ha ki jingpyrshang jong ki.
Ka karate ka la nang kiew man la u snem bad u snem 2025 ruh um shym la pher.
Da ka jingïalehkai National Games 2027, kaba ka Meghalaya kan pynlong, kaba sah sa tang shisnem tam khyndiat, ki nongïalehkai karateka ki pynlut por da ki kynta, ki taiew bad ki bnai ha ka jinghikai jong ki bad ban shah hikai pyntbit.
La sam ruh saw tylli ki khusnam ba kyrpang kata Best Karateka kata na East Khasi Hills – Ferrando Wanniang (Junior Boys category), Ferdinand Samkupar Rani (Senior Men), Emika Deimaia Myrthong (Junior Girls) bad Rebeka Nongspung (Senior Women).
