Guwahati, Risaw 25: Ki bor pahara kila siat iap ia u wei u nongialam ka seng lehnoh Maoist ha ka shnong Salakati, Assam kaba hap hapoh ka Kokrajhar district, u ba donkti ha ka jingpynbthei bom IED ha ka lynti rel ha kane ka thain.
Une u nongialam lehnoh jong ka Maoist uba la khlad noh la tip kyrteng kum u Ukil Hembram uba dei u trai shnong na Jharkhand bad uba la trei rieh ha Assam ha kine ki khyndiat bnai ba la dep.
Katkum ki pulit, u Hembram u dei uba donkti ba na lyndet ha ka jingbthei bom IED kaba la jia hapdeng ka station rel Kokrajhar bad Salakati ha ka 23 tarik mynta u bnai Risaw.
Haba bud ryntih ia ka jingtip ba la ioh na ki tnad syntiat, ki bor pahara ki la pynlong ia ka jingkhynra ne ka operation ha ka thain Salakati ha ka miet jong ka sngi Thohdieng, ha kaba utei u nongialam ka Maoist u la shah pyniap.
“U la mynsaw ha ka por ba ia siat kuli mar kylliang bad la rah ia u ha hospital ban ioh jingsumar, hynrei kham hadien u la khlad noh namar ka jingmynsaw jong u”, la ong ka tyllong khubor.
U Hembram, uba wan na Jharkhand, u la iaid lyngba sha Assam ban leh ia ki kam pynkhihwin, la iathuh ki tyllong khubor. U la pyrshang ruh thaw ia ka ktem rieh tngen hapoh ka jylla Assam na ka bynta ban pyniar ia ki kam jong ka seng lehnoh Maoist.
Na ka liang jong ki bor pahara ki la pynjur ia ka jingkhynra ha katei ka jaka ban wad ia ki paralok jong u.
Kane ka jingbthei bom IED ka la jia ha ka step jong ka sngi Palei, ha kaba ka la pynjulor ia kawei ka bynta jong ka lynti rel hapdeng ka Salakati bad ka Kokrajhar.Kane ka jingbthei bom ka la jia ha ka por kumba 1:00 baje mynstep ha shilynter jong ka Alipurduar division jong ka Northeast Frontier Railway (NFR), kaba la pynthut shipor ïa ka jingïaid jong ki rel ha katei ka lynti.
Na ka liang u Myntri Rangbah ka jylla Assam Himanta Biswa Sarma ha ka sngi Thohdieng u la ong, “Ngi la ithuh ia u briew uba don sha lyndet jong ka jingbthei bom IED hapdeng Salakati bad Kokrajhar, u don ia ki record kam runar ha Jharkhand bad Assam.”
Haba kren sha ki lad pathai khubor ha ka sngi Thohdieng, u Himanta u la ong, “Ki don ki briew ha Kokrajhar uba trei kam ruh na Jharkhand bad u don ka jingiadei bad ka seng lehnoh maoist bad katkum ka jingtip ba ngi ioh, une u briew u pyrshang ban thaw ia ka seng thymmai ha Assam hynrei u don ruh ka jingiadei kaba jan bha ha Jharkhand bad ki pulit jong ka Jharkhand kila thwet bha ia u.Ki pulit ka Jharkhand bad ka Assam kin pynlong ia ka joint operation pyrshah ia u,”.
Kine ki ban pynbthei hynrei kumno re kumno ka shaka jong ka rel ka kham heh bad la lah ban ïada na ka jingjia ba shyrkhei.Kine ki thmu ïa ka rel kit mar,” ong u Sarma.
