Shillong Nailur 14: Ka Khasi Jaintia Church Leaders Forum (KJCLF) hynne ka sngi Balang, kala phah daka dorkhas sha u Lamphang ka iing dorbar Thawaiñ ka jylla Bah Metbah Lyngdoh, ba pynrem jur iaka jingleh jong ka sorkar jylla bad ia baroh ki seng saiñ pyrthei kiba don bynta ha ka ban ai Lisen ban shna bad pyniaid iaka Casino haka jylla.
“Ka Sorkar kala pynpaw ia ka jingthok ba khraw ia ki paidbah bad ki kynhun bapher kynthup ia ki nongialam Balang bad nongialam Khristan namar ha ki por ba lah dep, ka Sorkar ka lah kren skhem ba kam pat pyniaid shaphrang ia kane ka kam” ong ka KJCLF ha ka dorkhas.
“Ka Sorkar kala pynpoh bad pynhap kyrdan ia ki phew hajar ki nongjngoh kai pyrthei kiba wan sha ka Jylla jong ngi man la ka por, ba ka Casino kan khring ia ki nongjngohkai pyrthei kiba don ka dor ba kham heh” kala bynrap.
U Secretary ka KJCLF Rev Edwin Kharkongor u la ong, “U Myntri ba khmih iaka tnad Taxation u la ong, ba ki trai shnong kin iohnong tang na ki saphit saphai jong kane ka Casino bad ki kam kiba iadei bad ka. Kane ka pyni ba la pynkynriah ia ki trai jylla tang sha ki rud ki kiar jong kiei kiei”.
Da kaba iohi ba ka Casino bad ki kam kiba iadei bad ka kin pynkha bad pynroi ia ki kam sniew kam beain, bad da ka jingsngewkhia na ka bynta ka lawei bad ka jingshngain jong ki khun samla ka ri – shynrang bad kynthei, ka KJCLF ka khot ia baroh ki Balang bad ki seng kiba sngewkhia halor kane ban pynrem jur ia kane ka jingleh jong ka sorkar jylla.
