Shillong Nailur 14: U Myntri Rangbah ka jylla u Conrad K Sangma hynne ka sngi Balang, ula pynthikna ia ka Khasi Hills Autonomous District Counci (KHADC) ba ka jingpyntreikam iaka CrPC bad CPC ha ka jylla kan ym ktah ne pynduh bor ia ki iingkashari jong ka District Council.
U Myntri Rangbah ula pynpaw ia kane ha ka jingiakynduh bad u Chief Executive Member (CEM) ka KHADC hynne ka janmiet hadien ba wai ka Dorbar Synrai.
Meeting with Hon’ble Members of the KHADC to clear the misunderstanding regarding the notification of the Code of Criminal Procedure (CrPC) & the Code of Civil Procedure (CPC) passed by the Cabinet recently pic.twitter.com/H9rPINfZbw
— Conrad Sangma (@SangmaConrad) September 14, 2022
“Ngi la iakren halor katei ka mat bad ka District Council mynta haka sien ka baar ban pynshai ia baroh ki jingsngewthuh bakla ne jingiapher jingmut” ong u Conrad haba iakren bad ki nongthoh khubor.
“Ka khubor kaba ngi la ai sha ka district council ka long ba ka jingpynmih iaka Notification ban pyntreikam iaka CrPC bad CPC kadei tang ban ailad iaki Judicial Magistrate ba kin bteng iaka jingtreikam kumba la leh da ki ADC Judiciary ha ka por bym pat phiah iaka Executive bad Judiciary. Kadei tang kane ka jingthmu jong ka Notification bad kam don jingthmu pat da kumwei ” ula bynrap.
U Myntri Rangbah ula ong ba ka sorkar kam don satia ia kano kano ka jingthmu ban pynduh bor ia ki District Council Court ne ban tuklar ia ki Village Council Court ne ban pynkylla iaka rukom treikam jong ki District Council.
“Ki bor jong ka district council court kila ioh iaka jingiada naka riti synshar ka ri bad ka Notification lada pynkylla bunsien ruh ki kyntien ki lah ban kylla bad kino kino ki lah ban pynsngewthuh ha kano kano ka rukom iaka Notification. Hynrei kaba kham kongsan kadei ka jingiada ia ki District Cuncil bad ia ki iingkashari kadei lyngba ka kyndon jong ka Para 4 & 5 jong ka Sixth Schedule, kumta kano kano ka Notification kan ym lah ban long hajrong” ong u Conrad.
Ula ong, ka jingthmu jong ka Notification ka long ban pyndep bad ban pynskhem iaka jingphiah iaka bor hapdeng ka Executive bad Judiciary.
“Kala don ka jingbym shai naka liang ka District Council bad ia ki kam Mukotduma hapdeng ki trai muluk yn bishar noh shawei hynrei la pynshai ba ia kitei ki mukotduma yn tian bishar beit hapoh ki District Council Court” ula ong.
Na ka liang u CEM ka KHADC ula ong, ka jingialang hynne ka sngi kam shym la shim ia kano kano ka rai bad lashai ka sngi ki MDC kin sa iakynduh biang ban shimsyndon iaka rai kaba khatduh.
“U Myntri Rangbah ka jylla ula pynsngewthuh ia ngi halor ka Notification ba kan ym ktah eiei ia ki District Council Court, Subordinate Court ne Village Court kaba mut ba ki CrPC bad CPC ka nym treikam ha ki iingkashari ki jong ngi, namar ba ngi don iaka bor kaba la pynkup daka aiñ katkum ka Para 4 & 5” ong u Bah Titos.
U la ong, kino kino ki mukotduma kiba iadei hapdeng ki trai muluk bad ki trai muluk ka jingbishar ia ki, kan long beit hapoh District Council Court bad ki District Session Court kin ym lah ban tian bishar ia ki mukotduma kiba iakhun hapdeng ki trai muluk.
