Shillong, Nailur 14: Ka Jylla Meghalaya ka wan balai napdeng ki Jylla ka thain Shatei Lam Mihngi ba bun eh ki jingjia thombor pyrshah ia ki Kynthei bad wan ba-ar haba phai sah ki kam thombor ia ki Khynnah, ong u Chief Whip ka Liang Pyrshah Bah George B Lyngdoh hynne ka sngi Balang.
Haba sot ia ka jingkhein bala ai da ka National Crime Records Bureau (NCRB) haba wanrah ia ka mat iatai ba lyngkot halor ka jinglong shngain jong ki paidbah ka Jylla ha ka Iingdorbar Thaw Ain ka Jylla.
Kat kum ka jingong jong u, haduh 558 ngut ki kynthei kila shah thombor ha u snem 2019, 568 ha u 2020 bad 685 ha u 2021. Haba phai pat sha ki kam thombor ia ki khynnah, ki jingjia ha Jylla bala pyntip pulit ki long palat 481 ha u snem 2021, 379 ha u snem 2019 bad 415 ha u snem 2020.
“Kala don haduh 22.7% ka jingkiew ha ki kam thombor pyrshah ia ki kynthei bad 27% ka kiew ha ki kam thombor ia ki Khynnah naduh u snem 2019. Kine ki jingkhein ki pynpaw halor ka jinglong jingman ka shongsuk shongshngain hapoh ka Jylla” ong u Bah George.
Une u MLA ka Umroi ula kyntu ia ka Sorkar Jylla ban shim ia ki sienjam ha ka ban pynthikna ha kaban tehlakam ia kiba kum kine ki kam bymman bad ban pynngat ruh ia ki nongleh bymman kat kum ki kyndon jong ka ain.
Haba pynpaw ba ka ioh ka kot ka Jylla kala shah lute, u Bah George ula ong ba ki paidbah kila buh jingkylli mynta ia ka jing donkti kata ka kynhun “high level” ha kaban pyniaid ia ka kam khaii tuh ia u dewiong.
“U Myntri Rangbah ula kam ba ka Sorkar kala trei miet bad sngi ban weng ia ki jingeh jong ka Jylla..hynrei kumno pat yn leh ia ki kam bymman kiba jia. Hato ka Sorkar kan shim ia ka jingkitkhlieh ba ia kaei kaba ngi lehm ngin leh ha ka lynti kaba shai?.Ngin lah ban leh harieh ia ki kam hapdeng ka miet” ula ong.
Une u MLA ula kdew ruh ia ka jingpynslem ban thungkam Pulit kaba la ktah ia ka jingtreikam ryntih jong ka Tnad Pulit bad ban tehlakam ia baroh ki kam beain nalor ka jingbym lah ban weng ia ka jingdheng kali bad kiwei kiwei.
Haba pynpaw ba ka kam wan rung beain (Infiltration) ki briew ruh ka dei kaba sngewkhia, une u Chief Whip ka Liang Pyrshah ula ong ba ki don ki hamsaia ba ki briew kila ioh ia ki Rohingya ha Sor Shillong.
U ong ba la dei ban pynkhlain ia ka bor syntiat jong ki Pulit haba buh hakhmat ia ka jingma na ka jingwan rung beain ki briew.
