Shillong, Risaw 16: Ha ka jingiakhun kaba kut noh artad, ka Rangdajied United FC, ka la sei ia ka buit ka bor ialehkai ka jong ba tang hapoh 4 minit ka la lah ba kan ioh ba kan thep haduh 4 kol, bad kane ka la biang pura shi syndon ia ka, ba kan lah ba kan pynliem ia ka Mylliem SC da 4-1, ha ka lympung ialehkai jong ka Shillong Premier League, ba la long ha SSA Stadium, First Ground, Polo,hynne ka nohphai sngi.
Ia kine ki saw tylli ki kol ka Rangdajied United FC la thep ia ki da u Micky Marwein (48’), Dibormi Kassar (49’, 50’) bad RT Hanson Pdang (52’), bad ia ka shi kol ban lait brut ia ka Mylliem SC na kane ka jingiakhun kaba dei artad kaba khatduh ka jong ka ha kane ka samoi ialehkai mynta ka snem, la ioh ban thep da u Alem Khongwir, kaba la wan ha ka dur ka penalty ha ka minit kaba 68.
Kumta da kane ka nam jop, ka pynlong ia ka Rangdajied United FC ba kan kiew sha ka kyrdan kaba san bad sah sa kawei ka jingiakhun ba kan pyndep da kaba ka la ioh ba kan khur 12 point na ki 8 tylli ki jingiakhun, katba ka Mylliem SC ka hiar sha ka kyrdan kaba 7 namar ba ka la lah ba kan khur tang 11 point.
Ka jingiakhun ha ka kylla step hi ka long ba ka rukom ialehkai ki ar kynhun ka long ba kin sdang shwa da ka jingiapyrshang, ha kaba la mih paw ki kabu ksiar ban ia pynkhih ia ka jar.
Hynrei dei tad haba wan ban bteng ia ka kylla miet, ba ka kynhun ka Rangdajied United FC, ki la kyntiew bha ia la ka rukom ialehkai ka jong ki bad ban kham nion tyngeh ka rukom ialehkai, kaba pynlong ia ka kynhun ialehkai ka Mylliem SC ban shah khyrwit haduh saw kol.
Lashai pat ka sngi ka jingiakhun kan long hapdeng ka Mawlai SC pyrshah ia ka Nongrim Hills kaban long ha ka por 4:30 nohphai sngi.
