Ther ka KHNAM ia ka jingbymlah ka Sorkar ban iarap ia ki paid Lapangap ban leit ot kba

Shillong, Risaw 16: Ka Khun Hynniewtrep National Awakening Movement (KHNAM) kala ther tyngeh ia ka jingkynnoh bym lah ka Sorkar ban pynbeit bad ka Assam ban pynbiang bor pahara na ka bynta ka jingleit otkba ki nongrep ha Lapangap, West Jaintia Hills District.

Kane kala mih tang shisngi hadien ba u Myntri Rangbah ka Jylla Conrad K Sangma ula kyntu ia ki paid Lapangap ba kin kiar shuwa na ka jingleit otkba ia mynta khnang ban lah wanrah shuwa ia ka jingsuk bad ka jingshngain ha kane ka shnong khappud ka Assam-Meghalaya.

“Ka long kaba sngewsih ba ki nongrep jong ngi na Lapangap kim shym la iohlad ban leit ot ia u kba hadien ka jingpyrshang la bunsien namar ka jingiai wan thombor ki briew na shnong Karbi. Nalor kane, ka long ruh kaba sngewsih ban iohsngew ia ka jingkren u Myntri Rangbah ba ong ba um lah ban ai ia ka bor pahara sha ki nongrep ba kin leit otkba namar kat kum ka jingong jong u, ka jingshngain ka jingim ka kham kongsan” ong u Working President ka KHNAM Bah Thomas Passah ha ka kyrwoh bala pynmih ha ka sngi Palei.

“Nga kyrmen ba u Myntri Rangbah ruh u sngewthuh ba ki nongrep lane ka shnong kaba im ha ka rep ka riang ka bsa ia ka iing ka sem da ka jingot ia ki marrep, lada ym shah ia u ban lei tot marrep, ka iing ka sem jong u ka don ha ka jingma. Ngi la khmih lynti ba u Myntri Rangbah un iakren bad ka Assam bad ban pynkohnguh ia ka jingpynbiang bor jingiada lang na ka bynta ka jingleit otkba ha ka thain” ula pynpaw.

Ula dawa ia ka Sorkar Meghalaya ba lada kam lah ban pynbiang ia ki bor pahara, ka dei ban siew bai lutksan sha ki nongrep halor ka jingduh jong ki.

U Bah Passah ula kynnoh ba ka jingbym leh eiei jong ka Sorkar ka don jingiadei bad ka jingpynlong ia ka elekshon, ia kaba la pynslem ban pynlong ia ka jingiakren bad jingiapynbeit tad haduh ban da kut ka elekshon ha Assam.