Shillong, Risaw 16 : Ha ka jingkyntiew kaba khraw ia ki kam jngohkai ka thain bad ka jingiatreikam hapdeng ki Ri, ka Emerhing North-East Eco Forum (ENEEF) kala iasnohkti bad ka Sorkar Meghalaya lem bad ka Kynhun ki Heh Sorkar na Thailand ban pynlong ia ka jingialang ban kyntiew kyrpang ia ki kam jngohkai ha Shillong ha ka 14 tarik Risaw.
Ia kane ka jingialang la pynlong da ka Tnad Jngohkai ka Sorkar Meghalaya bad la pynshongkun ia ka da ka jingiadon ryngkat u Lat ka Jylla bad u Myntri Rangbah ka Jylla Conrad K Sangma, kaba pyni ia ka jingpynleit jingmut jong ka Jylla ban iatehlok bad kiwei ki Ri ha kaban kyntiew ia ki kam jngohkai.
Haba kren ha ka jingialang, u Thanathip Upatasing, Ambassador ka Thailand sha India, ula pynpaw ia ka thrang dik dik ban wanrah ia ka jingiatreilang hapdeng ka Thailand bad ka Meghalaya ha ki kam jngohkai. Ula pynpaw ruh ia ka jing thmu jong ka Thailand ban pynsdang ia ka jingkamai ki liengsuin charter flight ne ki liengsuin ba wan kat kum ki kam ki kam sha Meghalaya hapoh u Nohprah 2025.
Ka jingiakren kala pynleit jingmut ha ka ban pynkhlain shuh shuh ia ka jingiatreilang na ka bynta ki kam jngohkai kaba neh, ka jingiasam jingtip markylliang halor ka kolshor bad ka jingiatreikam lang ban pynpawpyrthei ia ka spah mariang bad ka kolshor jong ka Meghalaya.
Haba kren halor ka jingiatreilang, ki nongmihkhmat ka ENEFF kila pynthikna ia ka jingkut jingmut ban nang pynbud ia ki jingiakren bad ka jingiatehlok,ka ban kyntiew ia ki kam jngohkai ha ka thain Shatei Lam Mihngi baroh kawei.
Ka ENEFF kala pynpaw ia ka jingsngewnguh ia ka Sorkr Meghalaya, ka Tnad Jngohkai bad ka Kynhun ki Heh Sorkar ka Thailand kiba la sei ia ki symboh pyrkhat ban nang iatei ia ka kam jngohkai ba don jingmut bad ba pynmyntoi lang hapdeng ki artylli ki Ri.
 kala iasnohkti bad ka Sorkar Meghalaya lem bad ka Kynhun ki Heh Sorkar na Thailand ban pynlong ia ka jingialang ban kyntiew kyrpang ia ki kam jngohkai ha Shillong ha ka 14 tarik Risaw.){kind=link}