Guwahati, Nailur 14 :Ka Assam kala ngat ha kiba bun ki jingeh bad ki kam lehnoh ki dei kiba hakhmat eh napdeng kine bad kiba la buh jingma shibun ia kane ka thain mynta lah bun phew tylli ki snem.
Na ka liang u Myntri Rangbah (CM) ka Assam, u Himanta Biswa Sarma haba jubab ia ka jingkylli da u nongialam ka Congress, u Debabrat Saikia ula ong ba kila don haduh kumba 1561 ngut ki khynnah samla ha ka jylla kiba la leit ban pyniasoh bad ki santylli ki kynhun kieng atiar naduh ka snem 2016.
U CM ula ongruh 811 ngut ki samla kila leit ban pyniasoh ia lade bad ka kynhun seng lehnoh NDFB naduh ka snem 2016 ha u 2022, katba 164 kiwei pat kila leit ban pyniasoh bad ka kynhun NLFB (Bodo), 351 bad ka kynhun PDCK, 203 tylli bad ka kynhun ULFA bad 32 ngut kila leit ban pyniasoh bad ka kynhun UPRF, kata hapdeng kine ki hynriew snem, kata naduh u 2016 haduh u 2022.
Lah ban kdew ba ka BJP kala wan ha ka bor ha Assam ha u snem 2016 hapoh ka jingialam u Sarbananda Sonowal bad hapoh kine ki hynriew snem jong ka jingsynshar da ka BJP, kila don haduh palat 1500 ngut ki khynnah samla kiba la kieng suloi.
Nalor kata lah ruh ban kdew hangne ba haduh kumba 8000 ngut ki dkhot jong ki kynhun seng lehnoh kila wan ban pyndem noh ia lade ha ka jylla ha kine ki hynriew snem ha ka jingsynshar jong ka BJP.
U CM Sarma haba jubab lyngba ka jingthoh ia ki jingkylli jong u Debabrat Saikia, ula ong “Hapdeng kine ki snem haduh 7935 ki dkhot jong ki kynhun seng lehnoh bad haduh 23 tylli ki kynhun kieng atiar kila wan ban pyndem noh bad iaid ha ka lynti kaba dei.
Napdeng kitei 4516 ngut ki dei ki dkhot jong ka NDFB, 465 ki dkhot ka NLFB, 915 na ka kynhun KPLT, 388 na ka kynhun PDCK, 378 ngut na ka kynhun UPLA, 246 na ka kynhun KLNLF, 181 ka DNLA, 178 ka kynhun ADF, 169 ka UGPO, 105 na ka sengULFA, 87 na ka NSLA, 77 na ka TLA bad 60 ngut na ka kynhun KLF kila wan ban pyndem noh ia lade”
Shuh shuh lah ruh ban kdew ba ka sorkar Assam hapoh ka jingsynshar jong ka BJP kala shim da ki sienjam kiba pyrkhing pyrshah ia ki kynhun seng lehnoh jihadi ha ka jylla namar ka jingshah khring jong ki samla mulsim sha ki kynhun seng lehnoh jihadi bad ban pynphriang ia ki jingiashun bad ki kam iaumsnam ha ka kyrteng jong ka niam.
U CM Sarma ula ong ruh ba naduh ka snem 2016 haduh palat 84 ngut ki briew kiba don jingiadei bad ki jingtreikam jong ki seng lehnoh jihadi kila shah kem noh ha ka jylla, kata kiba dei na ka kynhun seng lehnoh Jamaat-ul-Mujahideen Bangladesh (JMB), ka Hizbul Mujahideen bad ka kynhun Ansarullah Bangla Team (ABT).”
