Shillong, Risaw 13: Ki pulit ka East Khasi Hills kila shimkhia mardor halor ka jingjah jong ka khynnah 15 snem ka rta na Umpling bad hadien la lap ia ka na ka iingsah u samla jongka.
Katkum ka jingiathuh u SP Bah Vivek Syiem, ula ong ba katei ka khynnah kynthei kala ia ieid samla bad uwei u shynrang mynta la jan ar taiew bad kala mih na la iing da la ka jong ka mon ban leit iakynduh ia u.
“Ngi lah dep rejistar ia ka case ba ka shah rahbor bad ba set jubor iaka, hadien ba shem ba u shynrang u dei uba la heh ha ka rta katba ka kynthei kadei kaba dang khynnah. Ia une u shynrang la ialam sha iingkashari ban tian bishar. La dep ban khmih ia ka jingkoit jingkhiah jong ka kynthei bad la dep ban aiti noh ia ka sha ki bahaiing bahasem” ong u Bah Vivek haba iakren bad ki nongthoh khubor ha ka sngi Nyngkong.
U Bah Vivek ula banjur ia ki kmie ki kpa ba kin kren bha ia la ki khun, ban sngewthuh ia ka jingleh online ka jongki bad ban btin lynti ia ki b kinn kiar na kum kitei ki jingjia.
“Ki kmie ki kpa ki don ia ka jingstad bad jingshemphang bad ki lah ban btin lynti bha ia la ki khun lada ki lah ban don ia ka jingiadei kaba khlain bad kaba iajan bha bad ki” ula ong.
Ki pulit ka East Khasi Hills kila trei shitom ban kyntiew ia ka jingshngain jong ki khynnah da kaba shim ia kiba bun ki sienjam kynthup ruh ia ka jingiatreilang bad baroh kiba donbyntalang bad ki nongialam ha ka imlang sahlang, ka jingpyndait ia ki kor CCTV ha ki jaka paidbah, Guest House bad ki jaka khaii pateng, ka jingiaid pahara da ki pulit bad ki Village Defense Party (VDP) bad ban pynshlur ia ki VDP ban iatreilang bad ki pulit.
U Bah Syiem ula ai jingiaroh ia ka sienjam kaba la shim lyngba ka Shillong Smart City, kaba la iarap ia ki pulit lyngba ka jingpyndait ia ki kor CCTV ha kylleng ki jaka.
“Ki kam sniew bunsien kidei kiba la leh ha ki jaka ki bym hui hui bad ki kor CCTV kila ai jingiarap bha ha kum kitei ki jingjia” ula ong.
Ki pulit kila maham pyrshah ban ai ia kino kino ki jingujor kiba shu thok, khamtam eh ha ka jingjia kaba dang shen kum ka jingphla ka khynnah skul ba kala shah dung da u injekshon bad shah lute.
“Ngi kyntu ia ki kmie ki kpa ba kin khmih bniah ia la ki khun ki kti bad ban tehlakam ban ym ai kano kano ka jingujor kaba shu thok kaba lah ban pynlehnoh ei kai ia ka por bad ia ka bor ka jong ngi” la ong u Bah Syiem.
