Shillong, Nailur 13: U MLA ka All India Trinamool Congress (AITC) ba don ha Liang Pyrshah Bah Himalaya Shangpliang hynne ka sngi ba-ar, ula dawa ia ka Sorkar Jylla ban tohkit halor ka jingkynnoh pan bai skul ka skul SSA ha Ri-bhoi District na ki Khynnah skul.
“Nga kwah ban wanrah sha ka jingtip jong u Myntri ba ka don ka skul bala tip kum ka Nongrim Byrni Presbyterian Secondary School ha Ri-Bhoi, kaba la ithuh kum ka skul SSA ka Sorkar. Nga lyngngoh ba kumno ka Managing Committee kane ka skul ka la pan bai skul na ki Khynnah kaba long hapdeng T. 2500 haduh T. 3000 shibnai” ong une u MLA ka Mawsynram.
“Hato ka Skul Sorkar kam dei kaba ai pule ei?. Nga wanrah ia kane ban tip u Myntri. Sngewbha ban khmih ia kane bad ban phah tohkit” ong u Bah Shangpliang haba iashimbynta ha ka jingiatai ba lyngkot halor ki jingeh kiba mih ha ka kam pule dangle hapoh ka Jylla.
Une u MLA ula kynnoh ruh ba kane ka skul kam don satia ia ki Nonghikai kiba la biang kyrdan (qualified) kiba hikai ha ki klas IX bad X.
“Ki Khynnah ki hap bna pule hi na ki Help Book. Ki Nonghikai ki wan bad ong ba kane ka dei ka Help Book ba phin pule” bynrap u Bah Shangpliang.
Ha kajuh ka por, une u MLA ka Mawsynram ula kyntu ia ka Sorkar ban leh eiei lem halor ka kam ba iadei bad ki Nongtrei Mid Day Meal. U ong ba ju iohsngew koit ba kum kine ki briew kin iamih lang sha surok ban pynlong ia ka jingiakhih.
“Nga kyrpad ia u Myntri ban shimkhia lem ia ki jingdawa jong ki nongtrei Mid Day Meal. Balei ba ngin hap pan da ki dieng thang haba ki dei ban shet jingbam da ka tyndong lyer shet jingshet?. Ka Sorkar ka dei ban ai ia ki tyndong shet jingshet” ula ong.
Nalor kane, ula dawa ruh ia ka Sorkar ba kan pynkloi noh ha kaban thung kami a ki Nonghikai Contract jong ki skul LP kiba la pyndep ia ka eksam MTET.
