Shillong, Risaw 11: U Myntri ka rep ka riang u Timothy D Shira ula kyntu ia ki nongrep ba kin shim ia ki kabu kaba ai lyngba ka Pradhan Mantri-Dhan Dhaanya Kisan Yojana, kiba kynthup ia ki skhim bapher jong ka Sorkar Pdeng ban kyntiew ia ka rep ka riang hapoh ka jylla.
Haba kren ha ka jingialang kaba la long ha Integrated Agricultural Training Centre, Upper Shillong, ban iasnohkti lang bad ka ri baroh kawei ban pyllait paidbah u Myntri Rangbahduh ka ri u Narendra Modi lyngba ki kor ki bor ia ka PM-DDKY.
U Shira ula pynshai ba ki bynta bad ki jingdonkam jong kitei ki skhim bad ula iakren bad ai jingpynshai halor ki jingpynsngew jong ki nongrep.
Ia kane ka prokram la pynlong lang da ka Department of Agriculture and Farmers’ Welfare, Krishi Vigyan Kendra East Khasi Hills bad ka Meghalaya Agricultural Management and Extension Institute.
Ki nongrep na kylleng ki C&RD Block jongka East Khasi Hills District kila wan ban iashimbynta ha ryngkat bad ki ophisar na ki tnad sorkar, KVK bad ATMA.
La pyni sha ki nongiashimbynta lyngba ki kor digital ia ka ‘Live Telecast’ ia ka jingialang jong ka National Academy of Agricultural Sciences, New Delhi, ha kaba u Myntri Rangbahduh ka ri ula pyllait paidbah ia katei ka skhim ban iaid shakhmat ban pynlong ia ka ri India kaba shaniah halade bad kaba lah ban pyndap pynbiang.
