Shillong, Nailur 13 : U Myntri ka tnad ka Rep ka Riang ka sorkar jylla, Bah Banteidor Lyngdoh hynne ka sngi u la ong ba ICAR, Umiam ka dang lum jingtip ban wad ia ka daw halor ka jingbam khniang ki dieng kwai ha kylleng ki jaka.
Katei ka jubab jong u kadei ha ka call attention ba wanrah da u MLA ka Mawsynram Bah Himalaya Shangpliang uba pynpaw ka jingsngewkhia ia ka jingbym leh eiei jong ka sorkar ia ki jingeh ba kynduh da ki nongrep kwai kiba mad ia ka jingbam khniang lut ki dieng kwai.
U Bah Banteidor u la pyntip ba ha ka 22tarik u Nailar ki la ioh pdiang ia ka shithi na ka ICAR-NEH Umiam ba kin phah ia ka kynhun ba 6 ngut ki scientist ba lamkhmat da u Dr S Hazarika, Principal Scientist, Soil Science ban leit sha katei ka jaka ba shah ktah ha katei ka jingpang khlam ki kwai kynthup ha Umsawrang badDangar kiba hap ha Mawsynram C&RD Block ryngkat ka jingdonlang ka tnad Directorate of Horticulture.
Kumta ha ka 29tarik pat ka kynhun ki riewshemphang kynthup ia u Soil Science Scientist, Sr Scientist Plant Pathology, Sr Scientist Plant Physiology, Entomologist and Environmental Science Scientist ryngkat bad ki heh sorkar na ka tnad ki la leit sha kitei ki shnong ba shah ktah ryngkat ki heh sorkar na ka tnad Horticulture.
“Ngi la shim bun ki sienjam ban iarap pat i a ki nongrep halor aktei ka jingduh na ka jingbam khniang lut ki dieng kwai,” ong u myntri. U pyntip ruh ba ka tnad Agriculture bad ka Farmers Welfare hapoh ka Fruit Development Scheme ki la mang 6.27 klur na ka bynta ban sam ia ki tynrai dieng ban sam ei kum ka jingiarap ba mardor sha kitei ki jaka ba shah ktah hapoh ka snem treikam jong u 2022-23.
“Ia kane ka skim la pyntreikam bad la khmih lynti ba yn lah sam haduh 3,02,400 tylli ki tynrai dieng kait kiban ngiam kumba 189 hectate bad ruh kumba 73,95,000 tylli ki tynrai dieng sohtrun kiban ngiam haduh kumba 170 hectare. U Bah Banteidor u iathuh ruh ba ka tnad ka rep ka riang ka la buh kyndon ruh ban ai ka jingiada na ka bynta ban pynbiang ia ki kor synreit dawai khniang.
Utei u Myntri u pyntip ruh ba k ajingsam ia ki tynrai dieng kait bad sohtrun sha ki paidbah ka long katkum ka jinglong ka jaka bad ka jingiahap ki jaka thung khnang ba kin lah pat ban iarap kylla ia ki nongrep kiba la mad ia ka jingduh kaba khraw na katei ka jingiap jong ki dieng kwai.
Na ka liang u Myntri upyntip ruh ba katei ka jingpyrshang pyntrei kam ka sdang na Umsawrang kaba hap ha Mawsynram Block bad Rongsingre ha Chokpot kaba hap ha South Garo Hills hapoh ka jingkyrshan jong ka MBMA ryngkat ki ophisar na ka tnad Horticulture.
Kum ka jingpyrshang mynta ia ki drone la wanrah na Andhra Pradesh bad mynta ka Jylla ka dang pynkrheh ban wanrah noh da ki drone kiba kham bha kiba lah ban synreit dawai kham bun ka jaka ha i por iba kyndiat ym kum ki drone kiba ki pyrshang mynta.
