Dibrugarh, Risaw 9: U Myntri Rangbah ka jylla Assam Himanta Biswa Sarma u la ong ba ki Pulit SIT kin pyndep noh hapoh ka lai bnai ia ka chargesheet halor ka jingiap u nongrwai ba pawnam u Zubeen Garg.
Haba kren sha ki lad pathai khubor,u Himanta Biswa Sarma u la ong, ka jingtohkit ka dang iaid sha khmat ha ka lynti kaba dei kumba la khmih lynti hapoh ka jingpeit jong ka Special Investigation Team (SIT).
“Ngi la kem uwei hadien uwei pat, bad Nga thikna ba ki Pulit ka Assam kin aiti ïa ka chargesheet hapoh ka por ba la buh.Kadei ka kamram jong ngi ban ai ïa ka hok ïa u bad ngin ym map iano iano ruh,” ong u Sarma.
Shuh shuh u Sarma u la pynpaw ba baroh ki nongshah kynnoh yn sa wanrah hakhmat ka ïingbishar bad ba ka sorkar kan nym wad kano kano ka jingpynslem ban ujor bad mudui da ka mukotduma.
“Kham bunsien, ka por ba la ai ban aiti ia ka chargesheet ka long lai bnai.Ngin nym shim por palat ia kata ban pynthikna ba hadien ka jingtohkit, ka iingbishar kan lah ban ai ia ka hok”, la ong u Sarma.
U Sarma u la pynpaw ba ki don ki jingeh, namar ba ki dkhot ka Assam Association kaba don ha Singapore kiba la don lang bad u Garg haduh ki por ba khatduh, kim pat lah ban wan phai sha India, lait noh tang uwei, wat la ki la shah khot hajir ha ka SIT.
“Ngi dang pyrshang ba kumno ngin wanrah biang ia ki bad ngi dang leh ia ki jingdonkam baroh.Ngi donkam ban don ka jingshaniah — lada ngi duh noh ia ka, ym don mano mano ruh ban ioh ia ka hok”, la ong u Sarma.
Ka jingtohkit halor ka jingiap u Zubeen Garg, la iohi ia ki jingjia kiba bun jait ha kine ki sngi ba la leit.
Ha ka 1 tarik u Risaw, ka SIT ka la kem ïa arngut ki briew kiba ha khmat eh, kata u Siddharth Sharma, uba dei u Manager jong utei u nongrwai bad u Shyamkanu Mahanta, uba dei u festival organiser uba la pynbeit ïa katei ha Singapore.Baroh arngut ki la shah pynngat ha ka kam pyniap briew.
Ka SIT kaba la kem ïa u nongpynïaid ka North East India festival organiser u Shyamkanu Mahanta, u manager jong u Zubeen Garg u Siddharth Sharma, u nongtem drum u Shekhar Jyoti Goswami bad u wei pat ba ia rwai lang u Amritprabha Mahanta, ka la bteng ban kylli jingkylli bad la record ruh ïa ki jingkren jong ki briew bapher bapher.
