Shillong, Risaw 09 : Ka Kmiesan jong u khynnah 7 snem Kyrshanbor Kharmudai, ba lap ia ka metiap na khlaw Mawpat ha ka step sngi Palei, kala iathuh khana ia kiei kiba jia hashuwa ba une u Khynnah un jah rngai nala iing.
Kane ka Kmiesan Kong Trilin Kharmudai kala iathuh ba ka don ha Iing bad dang ai buin iala I Khun ha ka por ba u Kynshanbor u jah rngai ha ka janmiet 8 tarik Risaw ha Lummarboh, Nongrah.
Kala pyntip ba kam shym la iohi satia bad no ba u Kyrshanbor ula mih ban leit ialehkai. “Nga dang aibuin iala I khun bad dang thiah kai. Kila ialehkai phutbol shipara hynrei u Kyrshanbor u khlem treh ialehkailang. Ula mih shabar bad nga dang mut ka biang beit namar ba ki ju ialehkai shabar” kala ong.
Ka kong Trilin ka ong ba ynda kala khie na kaba thiah, kala pyrta ia u Kyrshanbor hynrei ym shym la lap shuh ia u. Kala leit wad kylleng ki jaka ia u kynthup sha ki iing ki para marjan bad sha Lapang hynrei kam shym la shem satia.
Kane ka kmienah ka pyntip ba u Kyrshanbor u dei u khynnah ba dang pule nursery, uba sngewtynnad ban ialehkai marwei hynrei u kloi pat ban wan sha iing haba khot ha ka por bam. Kala pyntip ruh ba u Kyrshanbor ula phong ia ka sopti rong jyrngam bad bujli pat sha ka rong saw hashuwa ba un jah rngai.
Haba kylli ioh don kino kino ki nongshun, ka kong Trillin kala pynpaw ba ki dang dei tang ki khynnah bad kam don jingmut ruh iano iano kiba lah ban wanrah jingma ia ki.
Ka Kmie u Kyrshanbor kala khlad noh dang arsnem mynshuwa bad u Kpa um shym la don satia ha Iing.
Ia ka met une u khynnah 7 snem la lap na khlaw ha Mawpat.
U Superintendent of Police Bah Vivek Syiem ula pynthikna ba kane ka dei ka kam pyniap bad ka jingtohkit kala iaid shakhmat. Ki Pulit ki lah ruh ban thaw ia ka Special Investigation Team (SIT) ban ioh kem ia ki briew kiba donkti.
