Ha u Naiwieng lah ban mih ka result thungkam Pulit, ong u Heh Ophisar

Shillong, Risaw 07: U Inspector General of Police (SB/Bdr) cum Chairman ka Central Recruitment Board (CRB) Dalton P Marak ula pyntip ba ia ka result jong ka eksamin thungkam pulit la khmih lynti ban sa pynbna noh hapoh une u bnai lane ha u bnai ban wan.

“Ka jingpynkhreh ban pynbna noh ia ka result kala iaid shaid shaid” ong u Marak haba iakren bad ki nongthoh khubor hadien ka jingiakynduh bad ki nongiakhun kam Pulit.

“Kam long kaba lah ban ai jingtip ha phi ia ka sngi hynrei kyrmen ba hapoh une u bnai lane la shem bnai, ngi dei ban lah ha kaban pynbna noh ia ka result bad ban sdang ia ka interview ia ki kyrtong ba shah jied” ula ong.

Kumba 54000 ngut ki kyrtong kila iakhun ia ka written test bad ka jingkhein ia ki marks ka dang iaid shaid shaid mynta.

“Nga la batai ha ki (kyrtong) ba ha kane ka jingthungkam, ngi la iohpdiang haduh 1.72 lak ki aplikeshon ha kaba haduh 1.28 lak ngut kila iashimbynta ha ka Physical Efficiency Test (PET) bad khatduh haduh 58,000 ngut ki kyrtong kila pass. Hynrei tang 54,000 ngut ki kyrtong kila iakhun ia ka written test. Ia mynta, ka kompani kaba pyniaid ia ka written test, ka dang pynkhreh ia ka result sheet” ong u Marak.

“Ki kwah ban tip ia baroh kine kiei kiei bad kumta ngi la batai ha ki bad la paw kumba kila hun ia ka jingbatai. Lada don mano mano ba dang artatien ne don jingkylli ban kylli halor kane ka jingthungkam, phi long kiba pdiang ban wan sha ka Ophis ka CRB ban iakynduh ia nga ha Police Headquarter” ula bynrap.

U Chairman ka CRB ula ong ba ka rukom pyniaid ia kane ka jingthungkam ka long kaba khuid bad ba shai, bad ia ki answer key la pynmih paidbah ia kaba ki kyrtong ki lah ban khein dalade ia kaei kaba ki ioh.

Kat kum ka jingong jong u, ki don haduh lai tylli ki copy jong ka OMR sheet- kawei ka copy ka don bad ka kompani ba kan khein ia ki marks jong ka written test, kawei ka copy ka don bad ka CRB bad kawei pat ka leit sha ki kyrtong.