Shillong, Nailur 29: Ka Nangkiew Irat kala ioh bat biang ia ka kyrdan kaba nyngkong ha ka Shillong Premier League 2025 da kaba pynrem da 5-0 ia ka Malki ha ka jingiakhun kaba la long ha SSA Stadium, First Ground, Polo, hynne ka sngi Nyngkong.
U Ronaldkydon L Nonglait ula thep ia ka kol ha ka 39 minit, u Jefferson Pakyntein ula thep kol ha ka 58 minit, u Wallamsuk Nongkhlaw ula thep kol ha ka 63 minit, u Himanshu Patil ula thep kol ha ka 69 minit bad u Banshanlang Nongdhar ula thep ia ka kol ha ka minit kaba 90’+2 lyngba ka Penalty.
Ka Nangkiew Irat mynta kala kamai 13 point bad kala tam da shi point ia ka Mawlai, watla ka Mawlai ka dang sah kawei ka jingiakhun. Ka Malki kala neh ha ka kyrdan kaba 8 bad lait na ka jingma ban shah pynhiar kyrdan ne Relegation Zone da kaba ioh 6 point. Kane kadei ruh ka sien ka balai ba ka Malki kan shah thep haduh 5 kol ha kawei ka jingiakhun.
Ka Malki kala ioh ia ka kabu kaba biang ha ka 17 minit jongka kylla step ha kaba u Elishar Ryntathiang ula shut ia ka bol hynrei la ioh ban iada noh da u nongap kol ka Nangkiew Irat u Surjay Kumar Pariyar. Hynrei ha ka minit kaba 39 u Ronaldkydon ula ioh thep ia ka kol na ka bynta ka Nangkiew Irat.
Haba ka jingiakhun kala bteng ha ka kylla miet, ka Nangkiew Irat kala bteng ban ialehkai bha bad kala ioh ban thep 4 kol katba ka Malki kam shym la lah ban thaw pyrthei eiei ban ioh thep kol haduh ban da kut ka jingiakhun watla kala pyrshang katba lah.
Ka jingiakhun ha ka sngi Baar, kan long hapdeng ka Nongrim Hills pyrshah ia ka Langsning ha ka por 4:30 nohphai sngi.
