Nongstoiñ, Nailur 27: Ka skul Edren Memorial Secondary School kaba don ha sor Nongstoiñ, ha ka sngi thohdieng ka la rakhe ia u mawmer ba 30 snem ha ka jingiaid lynti ban long ka sharak ka jingnang jingstad ha ka thain.
Katei ka shlem kaba la seng ïa ka naduh u snem 1995 da u bah Edrenshon Lyngkhoi (bam kwai ha ïing u Blei).
Ia kane ka jingrakhe la pynshongkun da ka jingiadonlang u MLA ka Nongstoin Bah Gabriel Wahlang kum u kongsan ha ka jingiadon ryngkat u Rev. J.L.Mawlong bad kiwei ki riew pawkhmat ka thaiñ bad ka kong Goldstone Syiemlieh Headmistress katei ka skul.
U kongsan u la pyllait paidbah ruh ïa ka souvenir jong katei ka skul bad ha kajuh ka por kum ka dak jong ka jingrakhe leh kmen la ïoh ban ot ruh ïa u Cake.
La pynphuh phieng shuh shuh ïa kane ka jingrakhe da ki sur jingrwai bad ki jingshad bad kiwei kiwei ki jingpynbyrngia.
U bah Gabriel haba ai jingkren, u la ong ba ka jingïaid lynti jong ka skul kat haduh ba kan kynjoh sha u mawmer ba 30 snem kam dei kaba suk. Hynrei, kumba u Blei um shym la weng ïa ka duriaw ba saw ha ka por u Moses, pynban u la phiah bad kad arliang ïa ka. Kumta hi ha ka jingim u briew ruh un um weng ïa ki jingeh, hynrei un plie pat da ki lad ki lynti ban poi sha ka thong kam dei ban duh jingkyrmen.
U la kyntu kynpham ïa ki khynnah skul da kaba ong kam pher la ka skul ka rit ne ka heh. Hynrei haba u ba pule u don ïa ka dohnud ban minot, yn ym don ba lah ban khang ïa ka jingangnud ban poi sha ka thong.
