Tura, Nailur 25 : Namar ka hukum jong ka Iingkashari Meghalaya High Court, u Superintendent of Police ka West Garo Hills, Abraham T Sangma, ha ka sngi Palei, ula khot iakynduh iaki nongialam ka Non-Gazetted Employees’ Association (NGEA) ha ka Ophis treikam jong u ha Tura.
Ia kane ka jingialang la pynlong na ka bynta ban pynshai ia kane ka Seng ki Nongtrei ka GHADC halor ka hukum ka Iingkashari ba pynmih na ka PIL N0 12/2025, kaba bthah ia u SP ban shim ia ki sienjam ba donkam hapoh ka hynniew sngi ki ban pynthikna ba ym dei ban pynlong shuh ia ka jingiakhih ba dang iaid mynta ha phyllaw ka GHADC.
“Nga la pynsngew ia kaei kaba ka Iingkashari kala ong ha ka hukum bad la bthah ia ki nongialam ka NGEA ba kin wad ia kiwei pat ki jaka iakhih ba kin pynbteng ia ki jingiakhih. Ki nongialamka NGEA kila pdiang ia ka hukum ka Iingkashari bad kular ba kin kohnguh” ong u SP haba iakren bad u nongai khubor hadien ka jingialang.
Haba pynthikna ia ka jingioh pdiang ia ka hukum, u nongaiktien ka NGEA Brithen M Sangma ula ong ba ka Seng ka burom ia ka rai jong ka Iingkashari bad kin konguh ia ka.
“Ngi la ioh pdiang ia ka hukum ka Iingkashari hynnin ka sngi bad ngi burom ia ka rai jong ka Iingkashari. Mynta ngin sa iashong jingialang bad ka kynhun jong ngi ban iarai ia kawei pat ka jaka ba ngin pynbteng ia ka jingiakhih da kaba jai jai” ula ong.
Ki bor District kin peit thuh bha ia ka jinglong jingman ban pynthikna ia ka jingpyntreikam ia ka hukum ka Iingkashari ha kine ki sngi ban wan.
 ha ka Ophis treikam jong u ha Tura.){kind=link}