Nongpoh, Nailur 25 : Uwei u Khynnah 9 snem ula lait da ka said na ka tyrsim jong ki nongrahbor ha ka janmiet sngi Balang, da ka jingkloi iamih paidbah ban iawad-kiba la lap pat hadien katto katne kynta na kawei ka khlaw ba marjan.
Une u Khynnah u dei ba na ka shnong Bir, kaba don ha lynti ban leit sha Mawrong, Ri-Bhoi District.
Kat kum ka jingiathuh ka Kmie, une khynnah ula jah katba u dang leit lum ia ka jingbam sniang na ka iing ki bahaiing kaba don marjan.
Ka ong, hynrei dei haba um wan phai iing katno katno ruh, ha ka por 4 baje-4:30 kala mih ban pyrta ia u ha kylleng ki jaka bad hadien kala pyntip ia u Kurim bad ia ki bahaiing hasem, kiba la pyntip pat sha u Rangbah Shnong ban iamih paidbah ha kaban wad ia une u khynnah.
Ha kane ka jingiawad, ki paidbah kila lap nyngkong eh ia ka tin jingbam sniang, kaba la pynsuba jur ia ki ba jia eiei ia une u Khynnah bad mar kumta hi kila ianiom sha khlaw ban iawad hynrei dei ha ka por 6:20 baje janmiet, ba kila lap ia une u Khynnah na ka jaka ba jngai kumba 200 meter.
Ki briew kiba iohi nyngkong eh ia une u Khynnah kila iathuh ba kila shem ia u ba ula thiah ha madan bad la tap ia u da ki sla diang bad ki tnat dieng, bad don tang kawei ka thliew ring mynsiem.
Ia une u Khynnah la ialam noh mar mar sha Iing bad hadien la pynkit sha CHC Umsning ban phah khmih ha ki doktor. Ki doktor kila pynthikna ba une u khynnah ula mynsaw malu mala na ki bynta ka kjat.
Une u Khynnah ula iathuh ha ka Kmie ba ki dei katto katne ki briew ki bym lah ban ithuh, kiba la pyrshang ban rahbor ia u.
Ki bor Shnong kila pynlong ia ka jingtohkit halor kane ka jingjia bad la pyntip ruh sha ki Pulit, kiba la hiar ban tohkit ia kaei kaba jia ia une u Khynnah.
