Shillong Nailur 24: U Symbud Myntri Rangbah ka jylla Bah Prestone Tynsong uba khmih ia ka kam pohiing, ula bthah ia ka Special Investigation Team (SIT) ban tohkit bniah halor ka jingjia kaba la lam sha ka jingkhlad noh jong i heprit ba dang 4 snem ka rta i Insaphira Lyngdoh Mawnai ha Nongrah Nonglum.
Katkum ka jingong ka jongu ka long kaba donkam ban tih bniah ban lap ia ka jingshisha ha kaba iadei bad ka jinglong jingman jong ka jingiap jong i Insaphira Lyngdoh Mawnai
bad ban lap balei u khynnah uba 13 snem ka rta ym shim la pyntip mardor shaphang katei ka jingjia.
“Nga lah dep ban bthah ia ka Special Investigation Team (SIT) ban ngam jylliew shuh shuh halor katei ka jingjia kaba sngewsih kaba la jia bad balei utei u khynnah ym shim la pyntip mardor shaphang katei ka jingjia. Balei ula sngap jar bad leh kum uto u bym bna eiei ruh” la ong u Bah Prestone haba iakren bad ki nongthoh khubor.
“Ka kynhun ka dang iaid shakhmat ha kaban ngam jylliew halor ki jingshisha baroh, ia kaba nga shimet hi nga sngew ba lada ka don kano kano ka jingbuhrieh kaba hangne hangtai” ula bynrap.
Ha ka 18 tarik u Nailur, u khynnah uba dang 13 snem ka rta, uba sah marjan uba ju leitkai man la ka por ha katei ka longiing kaba la mad ia ka jingsngewsih, la dep ban rah hakhmat jong ka Juvenile Justice Board (JJB) ha kaba ula kubur ba ula ialam ia katei ka heprit sha ka jaka kaba dang don hapdeng ka jingshna, ia kaba la lap ia ka met ka jongka ha ka 15 tarik u Nailur.
Ka Insaphira Lyngdoh Mawnai kala jah na ka iingsah ka jong ha ka por 8 baje mynstep ha ka 14 tarik u Nailur.
Ka kynhun jongka Special Investigation Team (SIT) kala pynlong ia ka jingtohkit hapoh ka jingialam jong u SP (City) u Bah Herbert Kharkongor, kala pynpaw ba u khynnah ula ialam ia katei ka heprit sha ka jaka kaba dang don hapdeng ka jingshna, ha kaba ula ur bad ula ioh ban tan lang ia katei ka heprit bad kala iap jyllop na ka jingbakla (Accident).
Ha ka kaiphod jongka Post-Mortem kala pynthikna ba ka jingiap kadei na ka jingngam jyllop bad ym shim la lap ban don kino kino ki dak ki shin jong ka jingshah thombor ne ban shah leh khlem akor.
Ha ka jingtohkit jongka SIT u khynnah shynrang ula phla ban ialam ia ka heprit sha katei ka jaka bad pyrshang ban thaw ia ka khana shaphang ka kali Scorpio rong iong bad ki briew kiba kah ia la ka durkhmat.
 ban tohkit bniah halor ka jingjia kaba la lam sha ka jingkhlad noh jong i heprit ba dang 4 snem ka rta i Insaphira Lyngdoh Mawnai ha Nongrah Nonglum.){kind=link}